2016年12月29日 星期四

什麼是債基疊增?高息回報攪咩葫蘆賣咩藥?

(題外話,自從加左EMAIL係個BLOG,收到唔少人問野,因為我懶,又無乜投資智慧,我全部都無答,近日有人問溝女問自身途,我決定集齋兩三條有趣問題行文回答。)

幾個月前,完全無財經知識0既男主人,走去學人買美國公司債券。再一次多謝STARMAN兄個BLOG提供唔少有用資料,此人正氣直接說話簡單有力,絕不收埋收埋叫人科錢去比料,新手想學?最頭個幾篇文最有用。

呢幾年好多人買樓,無不停買樓個D,就追求下被動收入買高息股有高息回報,例如一眾內銀,又有已死傷無數0既美容股。

最大問題,股市上落大,如借錢買股收息,補孖展機會高。另一方面,係香港一般銀行借錢,利息都至少三四厘,即使內銀派到六厘,所賺取息差,相對其風險,一D都唔吸引。低息?可以學止凡兄,按樓買內銀(息口兩厘吧),咁只要定期還按揭,樓價又唔急跌,就好穩陣。

男主人自從知道INTERACTIVE BROKERS,以下簡稱IB,可以借美金(兩厘以下)來買野,環球股票又得,債券又得,當然美國英國上市0既債券基金/債券ETF都得啦。

幾個月前,應該從其他BLOGGER得知,我口中講0既以租養租,一生三宅論果位作者,都有叫人加按層樓之後用"債基疊增"方案去提供8-2X%年高息回報。其實我完全唔認識佢,只係我唔鐘意收租仔,咪睇下有D咩新策略去收租咁勁。

我最鐘意,每次去書局快速打書釘,每次打一兩本。陶淵明話齋"好讀書,不求什解",我會重覆分幾次打一本,每次都快速睇哂,睇下睇下就知佢講乜。

其實果位債基疊增本書無乜講咩係債基疊增,本書講收租加按0既,都係個案分析多,其實都幾好睇架。至少,唔會好似求死隊長咁,講到你無樓無前途,又自以為收個租三四厘息已經好勁丫。(真係求死呢D井底之蛙都可以出書,我都應該自資出番本啦係咪?)

債基,可以係債券基金,又或者係債券ETF,其實都係一籃子買左一堆債券,再派番息同收番你手續費。比買債券好處係乜?

1比買單一債券好處係分散投資,爆一隻唔會TOTAL LOSS。或者咁講,你唔識揀,唔識睇評級同報表,佢幫你揀埋。

2同埋入場門檻細好多,幾十幾百美金有交易(其實IB買單一隻斬債都可以,唔一定要20萬美金起步0既)。

3仲有最開心係,唔少債基/債券ETF都係月月派息,唔駛好似買內銀咁,一年派一次等到頸都長,仲要忍受佢股價上上落落。

其實,大部份單一支債券一年派兩次息,要做到月月派息,只要買六支就可以,不用買債基/債券ETF。仲免除左管理費。

仲有債券基金/ETF個價格會變動而且並不保本(不過或者相對股票細,待証),而債券呢,只要佢唔違約,到期日係可以取番發行價AT PAR0既錢,而債價越近到期日,個價格變化越少TIM!

不過呢,大部份債基/債ETF都唔算好高YIELD,例如安碩個D啦,其實GOOGLE打HIGH YIELD BOND ETF就有好多選擇。

我相信一定有更高息0既,不過我懶得搵0者。


債券呢,一般MOODY評級B1-B3有6-8%唔難。以下係我個組合。剛剛好六支債券,不同月份派息。唔駛比管理費。

講番最初,我搵左債基疊增呢樣野,真係唔好笑我ON9,搵左好耐都無,原來要比錢上堂!下?乜話?從來我都唔會比錢去聽人講野,最多比錢聽演唱會咋喎!

GOOGLE一下,文章無一篇教你架!試埋GOOGLE PICTURE啦,D圖左遮右遮,驚死人知你買咩債基咁。想知咩圖?按此LINK

搵下搵下,原來好簡單。就好似收租仔講"整餅",其實只係按左層樓再買樓再加按再買。。。

將簡單0既事情改個咁0既TERMS為乜?(當初玩期權,見到雙龍閃又唔知係乜,不過搵得到解釋0既就得啦)

其實,債基疊增,即係用債基抵押再買債基,押借買番黎0既,再抵押再買。(即係同股票孖展一樣0者。)

小弟無財務底子,只有科學,醫學底子,不過計呢D數,只係會考數學題。

如果一個資產價值為1,可以抵押到其價值70%,咁押一次就有1+0.7,抵押第二次就有1+0.7+0.49,抵押第三次就有1+0.7+0.49+0.343,如此類推,

押到盡?1/(1-0.7),即係1蚊買到3.333蚊0既野。

如押到九成?一夫當關當十個!1/(1-0.9)

所以,聽到佢講疊增一次,疊增兩次,原來係咁。

而IB買得少的話,可以押九成,買得多,押七成。

難怪該BLOGGER/作者話,年回報可以由8-2X%,因為8%三倍就係24%!

借錢投資,從來都係雙面刃,其實男主人現時都做緊借貸,一蚊買左兩蚊野(其實未到),年回報都有10%左右吧(有一半個5-6%股息0既內銀,拖低左)。

不過如果有讀者心存僥倖諗住有20%年回報月月派息的話,希望佢地GOOGLE到我呢篇文,明白當中操作。其實係借錢買債券基金,而債券基金價格波動,有被斬倉危機(如你按得太盡),同時,債券基金/債券ETF並無到期日,若然個價格番唔到買入價,你任何時候賣出都係會蝕,在以坐艇坐到永遠0既。

仲有,去銀行買,手續費貴!!一陣收息又收你一筆,變相拉低利息回報。

我自己會唔會做債基疊增?NO WAY!我一買已經涉及借錢,已經係疊增。

不過IB入面PORTFOLIO MARGIN特性,你個PORTFOLIO越分散(地域及資產種類),佢對孖展要求越低。

我現在持有收息東西,有債券,優先股,SGX REITS。如果買高息債基,所需MARGIN只係10%左右(一百萬港元計),其實加拿大REITS都有高息回報,又唔會用盡孖展額度。

對我來說,分散收息才有用,集中疊加就唔好了。

呼籲一下,按個FB LIKE,支持一下,是我繼續9UP分享0既動力!

LIKE過0既SHARE一下吧(我認我貪心~~!)





2016年12月26日 星期一

匯易保定期壽險優惠編號 小明買保險


終於平安由意大利番黎香港,無遇到任何恐襲。

番黎坐CX UPGRADE 左去PREMIUM ECONOMY,無咁迫,不過其實呢D空位都係擠壓ECONOMY個D位出黎。沒良心企業。(佢UPGARDE 我其實一D都唔暗喜,一向唔鐘意CX,CX同大部份自己為上菜香港人一樣,都係仲以為自己好大支)




一番到香港,老婆開鋪,小弟本來想番自己鋪頭(講多次,我兩公婆各有自己小生意,類型、客源、收入穩定性完全不同,亦與本身專業毫不相關)

UPLOAD手信,洗衫,老婆執下野。。。


我無乜買野,老婆一個袋已經夠去多次歐洲,佢仲要買左兩個。。。


點知我太眼訓,一訓就訓到下午四點。。。

仲好樣衰咁,漏左現金(HKD二三千左右)係酒店保險箱。

酒店個邊肯DHL過來香港比番我,唔知要幾錢。。。哈。

其實我好怕飛機遇上氣流,今次坐十幾個鐘,如果有咩事,點算?

反正都要買,問過宏利個保險AGENT,2M保額無儲蓄成份,廿年可續唔加,要$4560一年。

HSBC 匯易保人壽可以網上報價,同樣2M保額同樣無儲蓄成份,十年可續唔加,要$2352一年。

當然,HSBC第二個十年加得多,咁就宏利抵D。不過,我要保0既,都係呢十年。

保到我一百歲個D,其實要黎托咩。。。

最後,我買左5M額(匯易保網上上限),一年六千有找。

也送上匯易保定期壽險優惠編號,如上圖。


萬一我瓜左,至少有五球比我老婆,最樣衰怕死心亂買樓又得,買股收息交租又得,如果已經按計劃買左樓,咪用黎清左個按揭佢。(香港人真慘,買一大筆保險又係為層樓)

我老婆見我買,佢又買。。。佢平好多,近三百蚊一個月,可能佢係女人又後生D啦。

如果一齊有咩事,起碼都有10M比長輩仔女丫。(未計我地本身D錢同股。)

如要計數,極力推介睇富足先生個BLOG,或其中一篇佢0既文。

消費型保單 vs 返還型保單


講番HSBC個網上投保,到而家都未CONFIRM我,可能聖誕節假期,我估星期三有結果吧。

最後,POST下我認為幾靚0既兩個景點。


另外,係意粉國想搵個杯面都幾果難,以下每個2歐羅。我習慣必食。。。


2016年12月21日 星期三

羅馬遊記 刺客教條的角度 part1

今年貪平機票同女主人決定去羅馬玩四日, 不過坐飛機來回都坐咗一日。

又係我最唔鍾意坐嘅國泰,又貴服務又唔係真係咁好,尤其短程機太多奄尖港人。

本來已經較咗鬧鐘,早48小時網上劃位,點知只係遲咗6分鐘就已經冇曬相連位,十幾個鐘分開坐,女主人唔太開心。 好彩blog 友R兄提我可以打去國泰cs,同佢哋傾下。

呢個時候應該好多花生友,話我買平機票 梗係冇得揀位。我又覺得冇理由得我嗰兩張機票係最平。我當佢有十張平機票,我只係遲咗6分鐘,無理由咁快冇曬相連位,仲難搶過演唱會?

第二日打電話去國泰,原來某啲航班佢哋保留咗一啲位畀唔識網上劃位嘅人。但即係話你班機冇人識網上劃位,咁識網上劃位反而無得坐好位?咁整黎做乜?

打去cs 第一個同我打官腔,收佢線,唔會好似求死隊長咁發人脾氣,佢都戇狗狗。

再打多一次第二個聽,佢解釋得好好,同埋畀埋個窗口連為我。

講番今次歐洲遊,坐十幾個鐘坐到腳都腫,落機坐機場鐵路 去火車站 行十分鐘唔夠就到酒店,去到酒店,窗外個風景一流,對正羅馬聖母大殿。

首天全步行,因大部份景點都好近。

同埋,教堂幾乎全部差唔多樣,第一間係靚,再去多幾間都係差唔多,只係大細之分。







有冇玩過刺客教條2?就黎有戲上映啦!

呢度d 建築物,有玩過個game 就識點樣爬上去屋頂了。

同時,噴水池,方尖碑少不了。




第一天就咁完結。

第二天?晨早五點已經訓唔番,時差影響吧。

一早進入梵蒂岡,聖彼 德大教堂就係教宗講野果度,入到去就係刺客教條某幾幕,其中一幕跳又爬到講粗口,另一幕係高處跳下殺boss...



真人點爬到最高?比8蚊歐羅搭電梯,之後再行多唔知幾多級樓梯到樓頂,真係出錢又出力,鬼佬韓嬸等都要抖。。。大媽?不見踪影啦當然。









出番黎去左梵蒂岡博物館,非常重覆,又唔識欣賞,大到離哂譜(相比北京上海韓國果d),靚唔靚?昨日已經睇到好盲目。。。








最後去埋聖天使堡,一見到外型,又係打機打過。尤其佢外圍個部份,個遊戲跟得好足。。。









未完。。。

今次機票同酒店都係Expedia book, 一萬四千幾,洗費女主人出。

雖然我成日鬧佢,其實都幾鐘意同佢去旅行。。。

註:意大利男正但女唔靚。大部份靚女都係外地遊客。而女主人,去到外地都比人認係日韓系,幸好不會當佢是大媽。



Related Posts Plugin for WordPress, Blogger...