小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2016年10月19日 星期三

非倒模式財務自由

PAGE VIEW 將達五十萬大關!是一種鼓舞!

近日打BLOG少左,原因有幾日受耳石移位困擾。

咩黎? http://www.kmuh.org.tw/www/kmcj/data/9906/5.htm

復位法後未能完全好番,好好休息左兩日,現在剩番一成問題左右吧。

原因?可能有期我無聊係度FING個頭。。。。哈哈~!

見止凡兄暫時停筆,十分可借。

要數BLOGGER無私出文,真正無CAP水者,寥寥可數。除我呢D嘍囉"平民老百姓"之外。

今個月又收到債息,左抄右抄學番黎。


$4125 美金,為本月十月被動收入。

十一月被動收入,除債息外,仲有一堆REITS收息,下月再講。

基本上月月有息收,無奈玩具反斗城債好似比人CALL左,只收左一次息。要再買過一隻。

等買埋兩隻優先股,再出個表統計一下每月利息來源。

****

另,見大家起哄式講財自,我又講下。。。

一講又要由為何寫BLOG開始講(小字體無關重點,可飛!)

早係1999年已經有寫BLOG習慣,果陣讀緊U,用HTML打字再UPLOAD上GEOCITIES,當時寫下番學,寫下同學(嘲笑多啦),寫下實習(所以我重記得當年實習趣事)。
出黎做野,有一段日子係記住我工作,而家睇番真係ON9,亦算是半個麻甩佬單身但唔受溝日記(小弟成個李力持咁樣,都有兵收!)
係2009年左右,當時係記下飲飲食食同女主人旅行遊記。

其實早在2006年,開始發現自己收入較同年同學歷朋友多,可能佢搵兩萬我搵六萬,佢儲一萬我儲五萬,長此落去會令股息收入高於自己每月所用(當時一個月,連埋家用都係萬幾蚊,每月25000被動已好夠,即500萬五厘息)。

之後開始網上搵下有冇呢D人分享,當然是無的。小弟財自並非由其他人啟發,是自己計數時發現的。窮爸一書,只係好後期睇過下,咪又係食正個浪大大聲!

直到2012年,開始記下自己投資同工作相關事情(當時已經好多收租仔),財自金額係身邊擦身而過多次,隨住結婚生仔開支上升,居住要求,通漲等,所需金額一路上升。

最後,兩次小型股災(2007,2011,2015我無事),知道再要預留部份BUFFER,結果金額再提升


細仔車陣!唔係車震。

******

以前我會諗,無乜人分享財自;大大話話,十年後,或者我係少數咁有準備,而非其他人講個堆勉強財自,突然啟發財自,死慳財自,為財自而財自。

佢地未必有能力財自但想追求財自,所以計劃要算盡。小弟計過,自自然然生活工作,都會有呢一個結果,問題係去到咩位先停。

因為,我本身物慾唔多,洗錢都唔多,現在已經好夠。再搵多D只會令生活腐爛,大富大貴我又唔會,窮到兩餐不繼又無乜可能。

唔上唔落咁,我可以點?

計到最盡,我呢世人咪最多得五千萬。不如二千萬就停低吧,唔見得多左三千萬對人生有何種突破。(多左三千萬,我D仔女又唔會鑲鑽石!)

你有冇計過,唔計增值,
一世人搵幾多?

你比幾舊榴槤我食,我會覺得好味;比我食哂一個,好滿足;比五個我食,自然唔太爽。(我知有個TERMS 形容,不過我唔認為人生可用經濟學解釋。)

除非會移民,否則三千萬同五千萬差唔幾。一兩個億?我應該做唔到!

還記得我對教育選擇是希望BIG FISH LITTLE POND,同樣,我要求在自己能力範圍以內,達成最美滿ACHIEVEMENT,並非金錢單一。

條路走到呢一刻,
聽到閒言閒語唔少,
有善意的又有葡萄的。

會否好悶?不會,悶個D係五十幾六十退休個班。還有青春精力,轉個身大把野攪。

人生無哂成功感?不會,做左紅海半個龍頭咁多年,要停了。光榮引退是好事,時代在變一切在變,趁未比人KICK OUT黎個華麗轉身,拍下屁股走人吧。

再者,成功感非單一來自工作。

走在財自路上,完成這使命,已算解鎖若干人生成就。此成就有幾人有勇氣去解?難得肯定做到而所需時間不多。

見到墨西哥餐朋友夫婦結婚週年都係食個靚飯,另有哂命女性朋友去個旅行都不停直播,就知道自由時間自由思想多麽珍貴。物質當浪漫?

浪漫應為不受拘束去放浪吧。

當你睇到住堆田區0既人,為左有地鐵為左空間而搬入,但又要有架車而有車位,你的人生是你的嗎?還是被物質拉著走?人生滿足度應如何計算?

同樣,為左有被動收入用黎供樓而不用工作收入去供,結果更加努力去工作幾年買兩層樓番黎用租金代供,又是否成功的財自陣式?

如資產大跌點算?我已預留BUFFER,如不幸都唔夠用,出番黎撈LAW!哈哈!又有乜所謂?

我最怕0既,十年八年後,小朋友長大了,唔再同你傾太多0既時候,存在感問題。不過呢個唔關財自事,我估每個父母都會遇到同樣問題。反正十年八年後,就由佢。比我做多十年,都係搵多一二三千萬,無乜意思。

留D錢比小朋友?我剩番咪比佢LAW。我完全無諗過,我完全唔覺得需要令我0既仔女都"食住"佢0既同輩,叻0既人,你點阻都阻唔到佢跑過你。搵到個樣好老婆老公生個靚小朋友,已經嬴在起跑線。

留資產?同係堆田區買個車位一樣,比某D價值觀拖住走,幫唔到子女,只能夠叫做"無計謀無目標下去消除自己不安感以及外人眼光吧"

你係個圈入面,我係個圈出面,睇0既野自然好唔同。

"車,佢讀書/搵錢/創業/財自好叻咩"

SORRY,
你是否還在圈內?
還是在井內?

財自後做D乜?做好多我想做同埋應該做0既事,係D乜?留個秘密吧。

至少,我同老婆都覺得,咁多次旅行最過癮係無目的北上玩左一星期,遠遠正過PLAN好哂咁坐飛機去他國;就明白,要浪漫並非物質,是放浪而不受拘束吧!


小女去同學生日會,麥記姐姐唔靚。

再呼籲下,LIKE下SHARE下我個FB PAGE丫,當流量不再單一時,更能令我暢所欲言。

各位0既留言係我繼續九UP0既動力!
小弟生活鎖事或股票期權小變動,會先係FACEBOOK分享,再行文。按此LIKE我FB PAGE

38 則留言:

  1. 教識下一代有獨立判斷能力,仲好過直接俾錢啦

    回覆刪除
    回覆
    1. 是的。不過將心比己,父母教的話,好很難教!還是等佢地人生際遇這些學習機會吧。

      我只能教,想做,就去做,不要帶著後悔。

      刪除
  2. //你比幾舊榴槤我食,我會覺得好味;比我食哂一個,好滿足;比五個我食,自然唔太爽。(我知有個TERMS 形容,不過我唔認為人生可用經濟學解釋。)
    係,叫滿足感邊際效用遞減法則,The law of diminishing marginal utility,好似係心理學名詞。

    回覆刪除
    回覆
    1. 噢! 謝謝池兄指教~~~
      以前睇過某經濟科名師片講呢個字,以為係經濟學~~~

      刪除
    2. 屬於Behavioral economics,當經濟學都o岩,不過Behavioral economics都係一群心理學家搞出來的。

      刪除
    3. 名師片?係咪講雙丸河之類咁?

      刪除
    4. 池兄, 原來係心理學踩過界...
      TEAMKILL 兄, 無錯, 就係果堆片...

      刪除
    5. 又未必喎,The law of diminishing marginal utility好似出現咗一段唔短嘅時間。

      刪除
    6. 應該好很舊。。。連邊個講我都SEARCH 唔到。

      刪除
    7. 經濟學同心理學都是社會科學, 講到尾都是研究人類行為, 互相交錯也不出奇。

      刪除
    8. 拋下書包先,冇記錯的話呢個理論係St Petersburg Paradox的延伸,起源於18世紀。最初係一個數學問題,後來變成心理學問題,最後成了行為經濟學問題。

      刪除
  3. 70兄唔do之日,鍾意做咩就做咩,買乜就買乜,同嗰啲cheap住過活來財自的分別超大。

    回覆刪除
    回覆
    1. 做咩就做咩 <--對呀!
      買乜就買乜 <--咁又唔得, 而家都唔會亂洗錢

      大家講0既CHEAP 精是否真有其人? 我唔太GET...只知有一個單身中年係咁.

      刪除
    2. 咁啱,我都知喎,唔知大家諗到嘅係咪同一個人。

      刪除
  4. 咁我既想法同70後兄有d唔同. 投資對我黎講係興趣, 即使財自左, 應該會照樣研究上市公司和去不同國度找尋可取既投資機會. 可能因為我已住過好多不同國家, 所以投資, 女, 生活, 或是興趣, 都已是世界觀咁睇.

    回覆刪除
    回覆
    1. 因為你比我年輕, 同埋無乜負擔, 無乜家室.

      相對彈性大好多.

      呢D 自由, 用黎生活同溝女都好有用.

      如果你唔撈, 反而無咁好魅力呢.

      刪除
  5. //麥記姐姐唔靚

    好似以前多d 靚女

    回覆刪除
    回覆
    1. 我無留意麥記姐姐好耐了。。。
      早餐時間見唔到的

      刪除
  6. 經我計算後,成世人應該搵到6百萬到(以現在人工計直至退休),扣埋日常洗費,儲到一半已經夠我平時洗用,可以諗退休

    回覆刪除
    回覆
    1. 其實好難計。
      打工可能會升職,做生意更加講唔埋。
      不過如果投資到六百萬,不妨套現一次,咁先達陣,再慢慢決定番工與否。

      刪除
  7. 哈哈倒模式~太多港豬懒得自己思考,不論讀書、工作、財務、整容...都要抄足人哋,完全冇自己既風格。

    回覆刪除
    回覆
    1. 網絡資訊太易得到,網絡好多未成功0既人教人成功。。。

      刪除
  8. 而家社會太多什麼買樓方程式,財自方程式,連小朋友成長都有方程式,攪到啲人以為跟住方程式行就實無錯,但睇得70s兄文章多,越來越唔鍾意聽所謂方程式,人生並唔係一條方程式,每個人都應該有自己不同人生!

    保重身子!

    回覆刪除
    回覆
    1. 森而兄,方程式好危險,可能係毒藥。會以為是自己夢想,最後自己吃掉夢想
      米高兄,無錯,好多事情都無得量化無得計算。

      刪除
  9. 50萬個click,勁。
    先比個like你,打破舊思維,跳出上一代圈設下的框框及價值觀的確要好大自信,能力及主見。
    By the way, 小心保重身體,人富貴一點後,特別多無厘頭的小毛病會出現。


    回覆刪除
    回覆
    1. 人老左,古怪病特別多。

      可能幾年後,班後生仔SEARCH 到你同埋我兩個BLOG,睇番創業的人心態如何轉變。。。

      刪除
  10. 自己的人生梗係自己話事:)
    揾到錢時,話事權就更多

    回覆刪除
    回覆
    1. 搵到錢,選擇更多。
      搵唔到錢,其實也可以追夢,只係可能會辛苦D,同埋外人會笑你打擊你咁LAW。。。

      刪除
  11. 多謝70後兄分享!

    財自達成法人人不同, 達成所需要的時間都不同, 最重要是有目標, 一步步達成!

    回覆刪除
    回覆
    1. 係,如達唔成,快樂生活好過勉強達到。
      好多事情比錢重要。

      刪除
  12. 十年前Blog界就已經興講財自, 估唔到到今日仍然好多人趨之若鶩。

    誠如不少投資好手及資深blogger所言, 財自重點在於自由, 能找到自己人生中覺得自由舒適的模式, 勝過無限金錢。

    祝70後兄耳朵早日康復!

    回覆刪除
    回覆
    1. 好多人為財自而財自,結果無所不用其技。
      失去人性吸人血以自肥。
      實屬可憐之輩。

      刪除
  13. 人大咗就發覺健康同家庭用多多錢都補償唔到

    回覆刪除
    回覆
    1. 你都唔係好大0者。
      及早明白,其實財自並不重要,當然,有好過無啦

      刪除

各位每個留言,係我繼續9UP動力,必覆。

Related Posts Plugin for WordPress, Blogger...