小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2016年9月30日 星期五

女主人燈神倉 中國郵儲銀行新股 我可以唔撈嗎20

近期又再抱恙,不過只係少少喉嚨痛,聽日應該好番可以番鋪頭噴油。

原來上個月無呢個系列出過,難得女主人股票倉有變動,即管SHOW出黎比人睇下。(當然,女主人係同意架啦)

佢多左D乜?

佢抽左中國郵儲銀行 1658.HK  ,分配結果?佢抽十中六!咁高中籤率,梗係有問題啦。

結果呢,佢又同各位抽新股搵食0既人一齊搭沉船。

一共24萬股票,連現金三十二萬係輝立,怕唔怕?無所謂啦。

印象中,佢得匯控同埋建行係正數,中車同郵儲都係負少少。

佢係我地家庭0既現金牛,以備不時之需,盡量唔會去做股票買賣,除非佢認為跌到價殘啦。

其實,佢買優先股賺息都係一個好出路,買價呢,買賣差價太大,急用時真係會蝕價。

講工作

呢個月又忙番一大輪,同時又埋數計下有幾多錢。果真如我所想,衝過左二十大關!每次以為已經係最大功率輸出,微調下結果又有空間再升。不過今年都唔太強求,KEEP住而家個收入到十二月先再算。

其實,下年2017做到15-17已經算唔錯。如2017年度都可以掂到二十萬,好有可能可以提早一年達標。

重有,令我最開心0既,係今年受氣比以前更少!我本身已經唔駛點受氣,今年忍痛作出改變,優化結構,本住最多做少D心態,點知反而唔駛咁受氣仲要錢多左。

唯一令人煩惱,係食材數量比較難控制,往時訂二十五包面粉,運輸哥哥好唔開心,可能因為太辛苦,搬重野0既錢又唔多。

上兩個月開始改訂15包,即時唔同左,至少運輸唔駛成日轉,上到黎又唔會黑面。不過我就好怕遇到無哂料0既情況。

另一方面,因為UPGRADE左部機器,而家機用0既材料係會JUST IN TIME送黎比我!至少,煩少左樣野。

無錯,我D小生意就係咁細小咁無大志,訂個水我都覺得煩,清潔搵清潔阿姐攪掂,總之我炒旦就算。

唔會放大個生意,
又唔會縮小佢。

等2017開個好頭,可以保障2017同2018生意OK,咁退休之路應該無乜問題。

講資產

建行現價5.89,曾經升到六蚊以上。

保守估計,升過六蚊我肯定全部股票倉位都番哂家鄉!喂,原來我D股票係蝕緊?保守估計0者,因我派息唔扣減股價,一路以來低位買入溝低個成本,應該都差唔幾了。(其實好肯定唔係打和0既,股息都收左百幾萬而呢兩年大手買入0既價錢都係5.5以下,兩年前邊有咁多錢去幾球咁買?)

另,持有六十一萬美金美國公司債,應該過兩日再有四千美金債息入袋,真的月月有息收。

再另外,有九萬美金買左GLD(黃金ETF)

再以SHORT STRANGLE 來做1:1期權。剛剛九月平左倉,獲利一千六百美金。再即時開左十月倉,130/124。


現槓桿比率為1.46,應該還算安全,若有其中一債違約跌到零,都唔會有咩事。建行跌到1.5先出事,除非,以上情況同時出現。

侍機再買入優先股食息,德銀唔諗,驚驚。都係睇HSBC個兩隻啦。

目標係維持比率係1.8之內,即借入金額係110萬美金(850萬港元)之內。’

都係個句,若建行升到十蚊,即時TAKE PROFIT走人逍遙遠去。

小弟非貪財之輩,只希望用錢換時間,去做一D自己想做0既事,幾千萬同幾億,其實無分別。

雖現在已好自由,但我想更自由。

講目標

其實主要係現金部份,考慮過能力問題,自由目標推多左一球。即800萬現金收山

以下是女主人部份:

以上係佢私人戶口
(佢重有公司戶口未計,個戶口好神秘平時唔拎錢出黎,佢自己都唔知有幾多,由佢)

女主人,HSBC入面有205萬,加埋輝立D錢,有32萬,一共237萬。

而小弟呢幾個月0既收入(60萬)都會還哂比佢,即係佢實際有297萬

男主人,三年股息,約170萬(如派息不加不減)預計明年三月至合約終結前,一共28個月,每月儲起八萬(低估前段高估後段啦),儲到224萬

即係,女主人(297萬)加男主人(394萬)
等於691萬!
剩番個109萬點算?
靠女主人吧,哈哈。

當然,只要我2017同2018都開得OK,其實女主人可能不用增加一分一毫。

再者,我未計美債,"金期權金",同將會買入0既優先股帶來額外收入。預計每月都兩三四萬。計埋其實已經唔駛用女主人錢。

八球,平平地買到區內三房(800呎實用了),又或者加多兩三球按揭,可以買過千呎實用全區最大個D了。

如果到時上車盤都要八球?
你估D人反唔反?

到時我都要講多句,我呢D偽中產家庭,
每月主動被動收入得個三十萬,
兩個廢柴夫婦學咩人買樓,
學咩人做生意?
學咩人寫BLOG?

講其他

UM。。。細佬開學並唔係想像中咁順利。上左成個月朝早都仲係喊0既,可能係因為我鬧佢。試下唔鬼理佢,睇下好唔好D。另,咁快已經有功課做,細佬無家姐咁醒,唔算太識做,唯有教下啦。

家姐?佢好多課外活動,又唱歌比賽又朗誦比賽,真係送苦了帶佢去學野練野0既女主人同埋我老豆。尤其女主人放低鋪頭東西走出來接佢,仲特登將公司固有假期改左(其實另一原因同公司有關,非私人因素),非打工就有呢個好處,至少時間可以自控。

女主人送我TURN A 高達盒旦,
因為佢記得我讚過靚


頂,其實我唔係特別鐘意TURN A,上次只係讚我自己噴得靚咋



其他集數,經典重溫,睇下以前我點諗退休唔撈?

玩野之作,經典重溫!
我可以唔撈嗎 1
我可以唔撈嗎 2
我可以唔撈嗎 3 (減父母家用至自由咁仆街?)
我可以唔撈嗎 4 (葵花寶典)
我可以唔撈嗎 5 (你真係信做埋唔夠交租?)
我可以唔撈嗎 6 (幾日千萬富翁)
我可以唔撈嗎 7
我可以唔撈嗎 8 (我係溫室小花,你做唔做得起?)
我可以唔撈嗎 9 (性格是遺傳)
我可以唔撈嗎 10 (唔同年紀, 目標不一. 六十歲仲講有收租樓?)
我可以唔撈嗎 11 (讀書真係無用?)
我可以唔撈嗎 12 (深水埗玩具模型倉有我整0既模型)
我可以唔撈嗎 13 (買夠貨)
我可以唔撈嗎 14 (千金難買少年窮)
我可以唔撈嗎15 (建行減派息 成功財務自由)
我可以唔撈嗎 16 (入廠維修
我可以唔撈嗎 17 (去蕪存菁;又上千萬)
儲夠七球就退休 我可以唔撈嗎18
資產再配置 我可以唔撈嗎 19

再呼籲下,LIKE下SHARE下我個FB PAGE丫,當流量不再單一時,更能令我暢所欲言。

各位0既留言係我繼續九UP0既動力!
小弟生活鎖事或股票期權小變動,會先係FACEBOOK分享,再行文。按此LIKE我FB PAGE

23 則留言:

  1. //每月主動被動收入得個三十萬,
    兩個廢柴夫婦學咩人買樓,
    學咩人做生意?
    學咩人寫BLOG?//

    70兄帶定哂頭盔,人哋好難入㗎喎

    回覆刪除
    回覆
    1. 哈哈, 可能我呢期睇得DISCUSS 太多~~~
      佢地個個幾億架MA...

      刪除
  2. 目標清晰,好快就到啦!

    回覆刪除
    回覆
    1. 係, 真係時間問題了.
      幾年前都係估估下階段.

      刪除
  3. 呵呵,祝70兄及女主人財務路更上一層樓!

    你囡囡咁靚靚,依家上課外活動,肯定成日俾男同學聊傾計XD

    回覆刪除
    回覆
    1. 哈, 佢成日扮可愛, 在一般女生眼中就係發姣...第時無朋友的.

      印象中佢都係女同學FRIEND D!

      刪除
  4. 打工仔搵個雞碎咁多真係無咩可能學到你咁⋯⋯⋯

    回覆刪除
    回覆
    1. 所以我建議後生仔, 反正無野好輸, 不如試下做鐘意0既野!

      唔好成日卦住買樓收租, 其實我都唔係咩投資高手, 只係最叻儲起D錢而已.

      刪除
  5. 見到師兄戶口D 銀碼真係好勵志!!

    回覆刪除
    回覆
    1. 有圖有真相.

      再者, 我呢D 年紀有呢D 金額都唔係奇事丫.

      正如五十幾歲人話自己財自, 其實去到咁老, 財自與否唔重要啦.

      刪除
  6. 最近想學玩噴塗, 氣bump有咩好選擇? (笑

    回覆刪除
    回覆
    1. 認真問?
      如初試, 買個百幾蚊平BUMP, 白色一個方形個D!

      玩落真有恒心就買個有氣缸0既泵啦. 一千人仔有好多選擇.

      刪除
  7. 陰公在有d人真係有自住需要,而老一輩不停比壓力一對新人, 仲會講: 拿, 係邊個邊個, 5年前買左樓, 睇下佢地現在幾好!

    (其實, 咪就係'一個好結果,不代表決定正確'的現實寫照)

    回覆刪除
    回覆
    1. 唉, 絕對同意, 而且有左家庭之後更加受壓, 好似小弟有諗過賣左自住樓去租屋, 因自住樓己開始舊, 不過過唔到自己哥關, 有時可能壓力都係自己俾自己, 驚累到頭家...

      刪除
    2. JOSEPH, 而家D 新人, 五年前先讀緊書, 邊有錢? 倒不如搵方法食番上一代0既租金收入啦.
      有好多野, 老人家係做唔到, 一定要你比錢幫佢做0既.

      老王, 最緊要老婆點諗.

      刪除
  8. 1658,點解公司上市會揀個咁o既no.,一路唔發。

    回覆刪除
    回覆
    1. 係喎!!
      唔講都唔留意.

      會否佢貪平, 買個平NUMBER 番黎?

      刪除
  9. 70後兄,我想請教下「幾年前都係估估下階段」果陣時心態上如何調整,因為對於我呢啲未起步嘅人,好需要呢方面嘅經驗!

    回覆刪除
    回覆
    1. 十一木你好

      可以睇番之前個D 網誌, 咁更加真實.

      其實財自最初已經知道一定得, 不過一路走到而家, 由以前要減開支0既財自, 變左而家唔駛點慳0既財自LAW...

      同埋, 呢幾年租金升幅, 變相令財自成本上升. 同樣班人覺得經濟好左, 生意收入又多左, 反而又由租樓財自, 變成FULL PAY 完仲可以財自.

      最重要, 係你女人肯陪你癲.

      刪除
    2. 謝70後兄分享經驗,小弟本來正處於準備好本金買樓之時,本來真係想買較高尺價嘅樓然後自己租較平嘅樓,但自從發現你個blog 之後就覺得以息養租比以收貴租養平租來得合理,所以我宜家積極尋找一兩隻可以令我以息養租嘅股!

      刪除
    3. 取向視乎收入,支出,與家人支持度。
      若本金收息已夠租樓,而家人亦支持,可以同佢鬥長命。儲儲下股息可租更大單位。

      刪除
  10. 70後兄真係離目標愈來愈近了,恭喜恭喜

    我個仔舊年返n班喊足三個月,諗起都驚

    回覆刪除
    回覆
    1. 係,兩三年內到達吧。女主人話,上一日已經無乜喊。
      同埋喊住番笑住放既。

      刪除

各位每個留言,係我繼續9UP動力,必覆。

Related Posts Plugin for WordPress, Blogger...