2016年9月26日 星期一

善良的人好相處 我的實習時代二

上次講過某次實習經歷

我的實習時代一 (男主人工作系列)


,今次講下另一次實習。

睇番舊相合照,原來已經係2000年0既事。

2000年,睇番GOOGLE FINANCE,匯控只係90蚊!如果果個陣有買,升到2007年140蚊的話,連股息有將近一倍!不過再持有多十年?

現價58.5,扣埋股息都未駛蝕0既。。。

買樓的話,你已經還完條數都未定!

你話喇,買股定買樓?

噢,唔記得講,大家記得2001同2003發生左咩事呢?買乜都好,亂做槓桿都係危險動作,賺左威威,輸左比人笑架!

2000年,我估身家接近一皮卦,中學時期留低0既,係2001年差唔多用哂了。你把握到機會,只係你老餅0者。。。並唔係後生仔唔夠勤力,唔肯蝕底喎!


三國傳 BB戰士 關羽高達!

講番正題,一個實習開心與否,睇老師仆唔仆街,又睇下同學衰唔衰啦。

分數對我黎講係浮雲,因這一個實習是在YEAR2!我YEAR1後期已下定決心唔做呢行,我都唔係得個講字,畢業後從未搵過本科工作。除左大半年後有少少有過回頭之念,幸好天時地利人和某公司因政府制度問題,取消左個OFFER!

當年實習有幾人?

LADY FIRST!由最唔知佢做緊乜果個講起吧。

S小姐,我只係記得佢叫咩名,實際上幾乎零交流,就係典型唔講野0既女仔,如果又唔係有少少樣,基本上係唔會主動撩佢。(全班成一百四十幾人,我已經叫做認得多人果個喇。)

實習黎講,實力無乜,攻擊力(對同學用計謀)為零。

要用FB大神先搵到佢近況,仲要唔近,2011年結婚生左仔。THAT’S ALL。有冇做番本行?唔知。。。

第二位係W小姐,印象中佢同我一樣都係魂遊太虛,實習傻下傻下但求衰唔中自己0既一員。當然大家都係表現到扮勁扮專業,不過大家一出手,便知有沒有。

最後?佢去左中學教音樂,我估都要教埋英文。最得意呢,係我本行同教育風馬牛不相反,卻有好幾個同學去左教書!可能因為名女校出黎D女英文都好D吧!呢D咪係起跑線好處,至少衰極都唔會做太差0既工作,係咪?

噢!佢讀嘉諾撒聖家0既!點解我知?因為我其中一個好老友0既大學同學係佢中同!

UM。。。樓上兩位女同學,個老公個外表都幾特別下。

第三位係K小姐,成個實習個人感覺同佢最易溝通!我很肯定佢唔會當我係FRD,不過至少係悶到HIHI0既實習入面,佢係比較好傾果個。

特點係好瘦!個樣有幾分似大力水手個女朋友

有冇諗過溝佢?完全無,雖然佢個人唔COOL,但個樣太COOL了。我係鐘意可愛型/童顏型。呢D冷但不艷的,留比有需要0既人啦。(當時我係有拖拍0既!)

題外話,YEAR3實習又同同一地方,結果最FRIEND就係佢了。

不過,畢業後無職絡啦,連FB都好似荒廢左(我懷疑PRIVATE左),照道理,佢都係做番本行0既。至少,我係某次見工見到佢,當年IN一份幾千蚊的所謂專業工。

我連SECOND IN 都無去,印象中最後請左果位同學,同埋佢做左一排又轉埋工了,LAST UPDATE已是2008年。

噢,順帶一提,佢係BLOGGER CHERRY 兄0既師姐。

明明呢科女多男少(6:4吧),幾次實習都係男多女少,D女仔去哂邊?


完成關羽高達,眼用貼紙其他噴油加手油。
有d 唔跟佢配色,關公紅面才是關公!頭頂ZZ米炮位還是紅色好。

另外三個男仔,又由最唔知佢做緊乜0既開始!

V先生,如果講出自雞校(荔景天主教定係嶺南鐘寧光),非佢同我莫屬!個樣成個海盜呀,山賊個D咁。我以前衰,成日夾埋D同學笑佢講野唔正音(十年後周街都無人正音啦),印象中佢都係大聲夾無準個類型,不難想像佢個外表加埋佢講野發音再加聲線,老師對佢印象好極有限。

佢而家點?好似信左主,做番本行,不過只係道聽途說。不過FB就見佢唔到,亦唔見佢係佢D朋友聚會上出現。但願佢一切安好。

其實佢係一個善良的人,世間上買少見少。只係佢同我一樣,見到太多人去走線,有點失措吧?如果從頭黎過,我會好好珍惜呢位實習同學。

我重記得,當年佢好HIGH PROFILE話自己勁,點知首次TEST,我遲到左十五分鐘,得九個字做,都高分過佢(我應該排到頭二十個最高吧,YEAR1仲算會比心機讀下0既)

第四位同學是智先生,喇沙書院的。應該又係讀唔到神科入黎,人靚仔成個張智霖咁,仲要係足球隊隊長,真係D女比佢溝哂。

不過,印張中佢無同同學拍過拖,可能一早名草有主?

份人真係又超級隨和,唔識(其實係我無準備過),問佢又會答你,結果,我差唔多隔日問佢野。

而家係點,佢應該從開始到現在都係私人執業中,當然一畢業要寄人籬下啦,而家肯定唔駛。有個四正老婆同仔女,幸福愉快生活去吧。

最後一個,是上次實習的阿蔡,不用詳述了。

呢個可以算係最開心0既實習!點解?因為無人扮勁無人暗鬥無人搶答問題。。。大家就嘻嘻哈哈過左幾個星期。當然,老師角色居功不少,佢就成個秦沛咁,輕鬆之中又肯教野,其實我地係黎學野,唔係黎考試!

我咩GRADE?哈哈哈!B+!

上天就係咁唔公平,我無乜犯過大錯又四四正正,佢以為我真係識,其實我唔係好識,同埋我D題目又易,比較好彩吧。

我私低下都同阿老師講過,我唔打算做番,應該不會在行內相見了。

呢個,應該係第三個實習。一共六個,歷時超過一千個鐘

比較有代表性,都係第二個,雖然YEAR1已經唔做番本行,不過第二個實習之後我幾乎以為我要肥佬而第一個實習,就認真咁識左我0既初戀情人吧,平時百九幾人你唔會同佢講野。

將時情記得,其實十多年後,D感想肯定唔同哂。當年容祖兒仲係剛出道,唔知第二定第三隻碟係LOVING U。朝朝係收音機聽到狂播。

而果邊食野又比較平民,同學又好,老師又無乜壓力比我地。真係過得輕鬆又偷快!

小弟打工生活時間非常短!畢業後計到盡只係做過三個月野,之後PART TIME頂左三個月,然後去左學炒旦一年了。

之後下山,去左讀POSTGRAD(同時亦幫拍檔炒旦),再隔一年,我去左做"我的志願"(基本上公司全部人都識我又好關照我,無打工FEELING!)

而家諗番,
大學呢三十星期實習,
已經算係我體驗做工仔0既點滴了。

呀!後尾讀個POSTGRAD,仆佢個街又有實習!不過D人好鬼頹又無學霸同我鬥,我輕鬆KO佢地啦。

唔講錢,係咪好鬼悶?


左邊未手油 右邊是素組
邊度買?特價$28咋。
下一隻張飛。

如果能力許可,請SHARE下我個FB PAGE丫,當流量不再單一時,更能令我暢所欲言。

各位0既留言係我繼續九UP0既動力!
小弟生活鎖事或股票期權小變動,會先係FACEBOOK分享,再行文。按此LIKE我FB PAGE

23 則留言:

  1. 而家諗返, 其實有無諗過唔使讀呢一科? :P

    回覆刪除
    回覆
    1. 咁又好難計,可能讀其他科,我鐘意的話,又跟同學一齊去打工呢。

      刪除
  2. 聽落你d 同學 都有唔少讀果行 冇做果行。但如果出黎做一排,自己開應該搵唔少架。

    回覆刪除
    回覆
    1. 自己開就一dd.
      同樣開間餐廳,一樣會有拍烏蠅。
      不過,總好過一般能力又打工個班

      刪除
  3. 回覆
    1. 哈哈。
      其實百幾個人,起碼有幾十條不同出路。
      一般科目都係三五十人一班。

      刪除
    2. Yes真係唔講錢都好睇呢=)

      70兄下次不妨講多些其他同學之間的情史瓜葛吧XD

      刪除
    3. Haha...
      同學間情史其實好簡單,當年無咁開放的。

      刪除
  4. 謝謝分享﹗
    在鄉大中,的確會有唔少不修篇幅的同學仔,玩得埋之餘亦可交心。
    BBQ

    回覆刪除
    回覆
    1. 係,不過有d 真係好有問題既。
      Postgrad 好多怪雞男。

      刪除
  5. 回覆
    1. 只能說,新界人。
      係邊區既人又有咩所謂呢?

      刪除
    2. 如果唔係附近的朋友邊記得啲學校名咁清楚 (^_-)

      刪除
    3. 竟然係咁既原因,我都ok 識得多屋村學校既。

      刪除
  6. 師兄我一路有一個問題...

    其實走線即係咩...=.=...

    回覆刪除
    回覆
    1. 小組分組賽進入淘汰賽,有球隊為淘汰賽對住弱對手,刻意輸比弱隊,為之走線。
      即用計謀去達到某d 著數。

      刪除
  7. 2001 / 2003 / 2008 / 2009 都難做槓桿. 但銀行好快又放水~

    回覆刪除
  8. D人總係拎成功既黎做例子,買樓成功就會話買樓點好,拿你買匯燶咁多年咪得個吉,但又忘記97,03年幾多人死o係樓市度。但同樣地,買股既咪又係一樣。講真,贏既就係皇道,買乜都好。

    回覆刪除
  9. 你d記性真係十分好, 十幾年前既野都記得咁清楚.

    回覆刪除
    回覆
    1. 哈哈, 其實都要睇番D 舊相先記得同咩人出過實習...

      刪除

各位每個留言,係我繼續9UP動力,必覆。

Related Posts Plugin for WordPress, Blogger...