2016年7月25日 星期一

靠財務自由 享受人生美好的時光

應該玩夠了吧!

話說,今個月又用左黎試下唔做野會否悶死!答案依然是否定,太好了。

踏入八月份,開始又忙番D,換左機器,感覺效率又高D。

今日又同女主人講下行家0既故事(其實十幾年間,通電話會有,真正見面少之又少。),諗諗下,而家部機得我一個用黎炒旦,人地一部機又多士又牛扒又雞扒。其實我好幸福。

不過,炒旦量高,我都好怕機器頂唔住。

昨日BLOG聚,又撩起女主人心裏一團火,連佢都想寫BLOG記低佢D千奇百怪0既客人(佢地D先有得出書!!)。(佢中文都係A)相對我高高在上咁炒旦仲要排長龍仲要無得食,女主人EQ高好多,佢D故事更加有趣,至於佢用咩方法演繹?等佢真係寫先講啦,走數機會好高

女主人新送我的BB LEGEND!其實已砌好騎士一號(第三盒)!
呢一堆易砌過武者烈傳(二百幾號)好多!!!

*****

上一篇講開財務自由(下簡稱財自),其實未完,此文作個補完。

因為唔同年齡層0既人,大家比較0既東西唔同,所以財自並無大不了,不過就可以有更多時間去享受唔同年紀階段0既美好時光。

如果咁勁三十歲財自,其實你身邊班朋友只會話"咁好悶","點打發時間",又去叫你做義工去旅行。因為大家比較多數係工作成就,有冇女朋友/老婆,搵唔搵到錢,有冇大志/抱負/人生目標。

所以男主人呢一刻,聽番黎0既大部份意見都係咁,可能我唔信邪,我直接無視。

咁年青財自通常繼續搵錢。我過左,無得搭咀。

到左四十歲,假設單身,梗係好似魔術師咁穿戴名牌靚車再去識下妹妹仔(眾數!),簡單D講就係下半生用下半身!(魔兄太正人君子,應該無咁做到/過!)

講番有家室把啦,其實鬥錢無乜用,大家都定哂形,你叻你0既事,你財自好叻咩?我唔同你玩!

其實,要比較就會係小朋友讀書同成就同埋生唔生性(港豬眼中都係讀書=生性),咁財自之後同個仔溫書?非也,陪下佢地也好有樂趣。

女主人今日問:"個女點解咁有自信",哈哈哈,就係爸爸成日同佢傾計!例如學校運動會,女主人剩係問佢好唔好玩,其實應該同佢參與其中諗下點玩,某程度上是PROBLEM SOLVING SKILL。另外,由細開始我已經比佢選擇(2歲開始),當然好多時候要痛陳利弊。最重要,佢入左一間佢能力內0既學校,班上算係精靈果個!至少唔會有怪獸家長鬥呢樣鬥個樣,大家公平學習之下,個囡自然有成功感。香港教育系列 - BIG FISH LITTLE POND

再大個D會點?我唔知。。。

我成日同佢講:"第時大個帶唔帶爸爸出街?"

當然佢話帶,我仲叫佢買高達比我TIM!其實,到佢大個應該做唔到,點會咁老土呀!?玩下手十二三歲左右就已經唔再同你傾計,更唔好講傾心事啦。

另,難得兩個都好孝順長輩,可能我帶佢去寵物店都話佢知幼貓成貓老貓係點,等佢知道生老病死是必然吧。

係佢四五歲呢一刻0既時光,係我人生來說,係十分美好的。(你毒J收租打簿又有咩用?)

阿仔就快三歲,慢就係慢D,而家開始識得玩陳述,開始識搵理由/藉口,離同我溝通日子不遠了。

財自有咩好處?你話呢?放工番屋企教仔,你仲有幾多精力,你仲有幾細心可以諗多一步?

呢堆財自人最爽,當人人0既美好的時光一日得四個鐘,可能佢有八個鐘。報紙亦集中講呢D爸爸點樣財自去照顧屋企。因為當少人做到而你做到,的鶴立雞群仲唔係你?




五十歲,必須過渡中年危機,若財自無工作,無主動收入,成就感低0既情況之下,好有可能又番番去做野。表面為過日晨又有意義,實際無乜自我認同。幸好我是我行我素的人,話唔埋第時我又有另一種野玩呢(例如而家會去做YOUTUBER!)。小朋友又開始大,唔再依賴你,而打工一族0既生活水平可能又追到你,比較之下會無咁爽。

呢一個AGE RANGE財自0既人係最多,BLOGGER入面亦有為自我認同感而樂此不彼0既老一輩。所以話財自好悶,財自後番工,又係呢一班。話旅行去到悶,一黎體力問題,二黎呢個年紀經濟能力,財自與否都可以去旅行了,又無得比較無得威威。

相信到時女主人(或者我都係咁)會打BOTOX,唔好比自己咁快老,走出黎至少年青過同年紀但要打工0既人。唔駛捱又可以做運動,KEEP得好應該唔難。

仲有,另一半健康同時影響歡樂影度。仔大仔世界,父母又可能已經唔係度,除左你老婆,仲有咩人可以親近?

六十歲唔能夠叫財自,只能夠叫提早退休吧。不在討論範圍內。不過,呢D年紀比較乜?比較兒孫吧,佢地生性否,有成就否,仲記唔記得你呢個老豆否,係咪好取決於你之前點對佢?如果你三十歲已財自,獲得相處時間更多,大家之間0既凝聚力是否更高?

一星期飲一次茶,定係過時過節探你,定係無乜特別事都唔會番黎睇你,是否睇你當初點樣管教?

再老D,我唔諗啦,同財自無關。身家散左比仔女就算。

****

以上,並非講財自後做D乜,入面都只係其中一樣,享受自己生最美好的時光

至於你會否再進修,會否教人做生意,會否去做義工,會否去出書,就人人唔同。例如我在砌高達一樣,而家就要搵下自已鐘意做/玩D乜吧。。。

明天建行股息應該到賬。其實36個月內工作收入儲起0既錢就係財自0既BUFFER。反而三年股息係要比番女主人,要還番錢比佢啊~~~

只計我一個的話,接近一千一百萬股票(現價計),三百萬現金(預計),應該粗粗地夠洗吧。(未計女主人)

今日望住佢個童顏(省略後二字),應該佢五張野仲會比人誤會做三十幾。佢而家仲有人以為佢係學生妹。。。有冇攪錯!

下圖為兩星期前成品。

雷霆吉姆(左為未上水貼,右上左,係咪好D?



金屬錄色(深淺兩色),珍珠白色珍珠灰色,星光銅,星光銀

呢張連滲線都未做!個盒好靚呢!隻野79蚊咋~


女主人對高達既知識,都唔係流架!

各位留言是令我繼續九UP0既動力,必覆!
如有任何頭暈身慶,水土不服,或者約我去街HEHE一番
按此EMAIL 我啦!

33 則留言:

  1. 之前睇完隻400號BB戰士,發覺實在抵受唔住佢ge引誘,於是買左佢同另外幾盒三國傳番屋企(新果d 我只對三國傳有興趣,但其實三國傳都好舊,有d model都比較難搵)。十幾年冇砌,依家淨係砌隻豪華翔烈帝都砌左成日。雖然只係諗住勾下線、用支marker求其油兩下,不過感覺真係好正!

    回覆刪除
    回覆
    1. 果幾盒三國傳要上色都幾蝦人。三百號打後果d 都ok. 二百幾個d 有排攪。
      用marker 係好方法。不過大面積/金色也乾否?

      刪除
  2. 財自最大好處係釋放番時間比自己,但要係未財自前培養多d興趣,如果唔係財自後會悶。好有興趣70後兄分享教仔女心得,期待你的分享。

    回覆刪除
    回覆
    1. 係,放番時間比自己。
      但又有人嫌太多時間,唔知是否奴性太強,要忙既,洗個廁所都半日。
      教仔我初哥來啦,9up 下架咋。

      刪除
  3. 你教仔女都有一套. 值得學習. 最不屑虎媽虎爸~

    回覆刪除
    回覆
    1. 無乜方法架咋,我都係新手。
      不過怪獸之鬥我就唔參與了。

      刪除
  4. 我完全未夠料財自,但已經一日到黑都陪小朋友。唔把握而家機會,大個左佢哋真係唔會再同阿爸咁傾計。我阿仔兩歲個陣我都有同佢商量轉唔轉學校,聽落好難以置信,其實佢既邏輯分析已經好好,好多野自己都諗得到又表達到。

    回覆刪除
    回覆
    1. 比佢揀開一次,慢慢就識揀。揀玩具咁,佢已經唔會買假野。。。

      刪除
    2. 自細俾佢哋分析利害,知道世事無完美,大過唔怕有選擇困難症

      刪除
    3. 呢點好重要。而家有時阿仔投訴,如果件事係佢事先知道又有份決定,我會話佢聽你有份揀,佢之後諗諗下就會無事。

      刪除
  5. 錢搵唔晒, 夠駛就去享受人生, 超正又羨慕!

    回覆刪除
    回覆
    1. 應該係慾望完成唔哂,社會會有人不停話你知下一步要點。
      其實自己路自己行吧。
      買車買樓買基金。。。

      刪除
  6. 呵呵,做單身一族、DINK、還是有兒有女,財自的門檻可以好大分別。

    我比較頹,現時的生活模式及心態已接近半個"財自",都係時候揾多哋手藝玩下啦=)

    回覆刪除
  7. 我老婆都話想寫Blog, 不過應該都係會走數XD

    回覆刪除
  8. 我覺得財自後要能快樂的重要一part, 就係有一班同level的朋友能共樂為伴。 同级數的朋友可分享心事時無炫耀令人不快感,大家全正能量欣賞人生事物,日日有新鮮精彩好玩事。

    回覆刪除
    回覆
    1. 我身邊無乜呢D 朋友...哈哈哈.
      不過負能量的人也不算多

      刪除
  9. 2至5歲最好玩,6、7歲之後識駁嘴,女仔會好小小。

    回覆刪除
    回覆
    1. 池兄仔大女大了呢。
      而家都識駁咀了。。。都預左,我地以前咪又係咁

      刪除
  10. 財自前就要諗定財自後的人生真正目標. 保持開放和童真, 幾緊要.

    回覆刪除
    回覆
    1. 有目標就可以了,又未到人生目標咁厲害。
      比別人多空閒時間已是萬幸

      刪除
  11. 女主人真犀利!有幾多女仔會認得高達個樣!

    回覆刪除
    回覆
    1. 佢話,佢都係以前同我玩高達GAME識的。

      刪除
    2. 唔係,打wii gundam gashapon wars.
      好多機體,佢重記得吸收光速個隻曉。

      刪除
  12. 我都要學下你教仔女那套、盡快去財自~~~~
    P.S.又來57萬建行股息~~~~勁勁~~~~

    回覆刪除
    回覆
    1. 教仔女, 我都係新手.
      你識計數, 真係57萬幾...好彩人仔未算跌得勁.

      刪除
  13. ic, 其實成功後要為自己構思收山后興趣活動十分重要, 小弟報出被動現金流是真, 如要作大, 起碼都作到20-30萬一年, 不過呢D野都是老實D好,因將來退休后便要用, 作大個數到頭來沒得禁多使就沒意思. 70兄果然在blog 界多fans, 希望我們將來有緣相聚

    回覆刪除
    回覆
    1. BLOGGER 都是朋友,不是FANS 吧。不過纏住唔放的對頭也不少。
      作唔作大,其實好易睇,當然數目細作大動機都細D啦~~~

      刪除

各位每個留言,係我繼續9UP動力,必覆。

Related Posts Plugin for WordPress, Blogger...