2016年6月17日 星期五

經濟變差了 (二) 女主人生意

先講模型,以下係國產 1/100 BTF ZZ GUNDAM



砌後感在文末

大家有冇抽IBOND? 輝立 IBOND 又出事,女主人無得抽,系統出錯。咁都得!? 拿,男主人無事,不過我少少地賭白頭片抽左三萬蚊0者。一手當食個飯。

講番女主人生意麻麻,其實都唔係今個月0既事.

今日佢番到屋企, 話好累. 其實估到佢又得閒左一日!

因為無野做坐係度,先係最悶!有事做的話,一日好快過,係咪?

都係個句,如果做唔住,都仲有我養。我客人好高端,除非去到谷底,無乜可能我會被人CUT BUDGET。(到時一定寫BLOG 叫定各位買股買樓)

如果真係要蝕,都係租金同人工,有限數,幾十萬。重要假設零生意喎!

男主人公司都係咁,生意一路爆哂錶,預計下年都係咁。。。直至租約完結。

如果女主人做唔掂,我咪又撈多兩年LAW,無乜野0既。當搵埋佢退休個份。

下星期男主人生財工具要續約,要換新機。真係千萬個不願意!

一黎張約又簽過,正常一簽就五年,我得番一年租約,點好?另外,換新機又要學過哂點用,我唔係好想學唔係好想理。

咁耐無UPDATE,當然我唔係死左,只係天口變熱,我D生意忙到七彩。等天氣熱定左,就好清閒了。(23-28會離港數天),七月頭又係輕鬆放假~

講番女主人,佢個生意由2009年年底到2016年,其實都有六年,花無百日紅,呢六年搵到0既錢都唔少,平手下,蝕下都可以接受。

可能我講得輕鬆,因為我自己生意好難蝕錢,成本唔高!只係最怕因年紀問題做唔到。我打從一入行已經知道,開頭以為只可以做十年,點知做下做下又可以繼續。當有新人加入呢行,佢D配套又唔夠我黎,不過今年已經唔覺得有人入行了,可能大家知道飽和左?

經濟肯定差左,眼見一D唔算太有錢(可能我有過佢)0既客想唔食但又要食;又見有新客食兩啖無理取閙走左(呢個好爆,走黎鬧我,十幾年可能佢係第一個)。中中產產0既都開始縮皮。

你睇下D普通地鐵商場人都少左就知啦。

有錢個D唔影響,但揹左筆數要供樓個D呢?

再艱難既年代我都經歷過,即使經濟下行咪慳D洗。

當人人都慳,你估租務市場會點?你估仲有冇咁多人借錢買樓?

我其待出現這個時代!時這個時代,才是年輕人發圍的時代。

下圖為國產翻模 BTF ZZ GUNDAM! 1/100。

人仔85蚊!如果比我揀多次,我唔會買同砌佢。
剪件已知唔對路,咁多無謂分件。
噴果陣仲衰。。。d 膠差。仲噴左好耐。
砌,大力金剛指伴粗口少不免。
滲線,我低技術人士玩下0者,連坑都無條。。。
上水貼,成九十張。感覺似砌rg...
最正係支砲,雙槍又得單槍又得。雙槍下手關節改改下可免不舉。
珍珠白配金屬色,傷眼莫怪。






雖然砌得好痛苦,不過砌完0既成功感係值得0既。

都係個句,唔專業有唔專業0既快樂。

今日交收高達,果阿姐問我咁大個人仲玩呢D野!哈哈!唔得架咩?問我係咪成屋都係,都唔算,因為放左唔少係公司。


各位0既留言係我繼續九UP0既動力!
小弟生活鎖事或股票期權小變動,會先係FACEBOOK分享,再行文。按此LIKE我FB PAGE

28 則留言:

  1. 現在的樓價同租金實在太高, 我也期待 下跌的來臨。

    回覆刪除
  2. 就算學四叔話樓價跌多一成,好多人依然都無法買樓...
    一來按揭問題,二來現在打份工都未必穩陣,一裁員就要即刻起身,到時仲邊有錢供樓?

    回覆刪除
    回覆
    1. 咁就要睇下有幾多人一路忍到手,唔買股唔買樓捕捉呢次機會。不過肯定一買要坐番三五七年都唔會升,大家都估到,所以只宜自住。
      睇下邊個有cash 啦,唔係講加按拎到幾多,係指現兜兜拎出黎拎到幾多。

      刪除
    2. 謝70後兄分享!自沽出中電止賺後,我都係死hold哋現金+繼續儲錢,因現時真係冇乜股票啱心水買~

      個人認為呢緊一、兩年經濟實有大檸樂野,cash is king的時代不遠了。大家加油好運呵!

      刪除
    3. 我現金水平唔高,不過夠少少地執下平貨。
      現時九成都係股票。

      刪除
  3. 回覆
    1. 我地兩公婆D生意主要食上一輩0既錢.

      佢地都係最駛錢果一班, 例如而家勁歌金曲好多舊歌, 都係為左呢班人而播.

      寒暑表唔知係咪, 不過捨唔捨得洗錢就好易見到.

      刪除
  4. 做生意係咁,風順時就執幾年大錢,積埋過一個循環, 到開始熱退兼經濟差時,能守住縮皮成功過渡左個鴻海,
    搞下搞下又會比你發現到另一個新藍海。幫你賺錢最勁的,好多時都係你最初估計唔到的。 加油!



    回覆刪除
    回覆
    1. 簡單D 講, 好天收埋落雨柴。
      平時大駛開無儲到錢,生意一差就無哂士氣。
      結果好多前輩都話:"做生意我以前都試過。。。"

      刪除
  5. 科網泡沫:人工狂加
    SARS:輕輕鬆鬆買樓
    金融海嘯:身家暴漲
    唔知幾時起對所謂的經濟危機特別期待。

    回覆刪除
    回覆
    1. 科網我未畢業,沙士無錢。
      海嘯果陣死守股票。
      今次真係有CASH 睇住班按盡哂無錢買又收唔到租0既上一代黎打。

      刪除
  6. 近月分別同三個的士佬傾過, 個個都話揾少左兩、三成。下一個目標係揾Uber司機double check......

    回覆刪除
    回覆
    1. 女主人成日坐UBER, 都易CALL 左。
      其實睇大型商場就最睇到消費意欲,講MTR中等級數個D,唔係又一城置地果D啦。

      刪除
  7. 我都等緊經濟危機, 到時應該係時候番香港了.~

    回覆刪除
  8. 點解Bandai貴d,就真係水準高d既,不過你既製成品都好靚。
    出面唔少人都未知死,到佢地feel到經濟差既時候,已經遲啦!70後兄如果生意再差左,記得單聲。
    每次經濟唔好,就係洗牌既時候,把握到財務進程真係會快唔少。

    回覆刪除
    回覆
    1. 其實我地太年輕, 未遇過洗牌...小心比人反洗~~~

      哈, BANDAI 個隻好肥...呢隻其實係翻人地D 首辦設計.

      刪除
  9. 做生意人眼中既經濟狀況,同小市民真係唔同喎

    回覆刪除
    回覆
    1. 差唔多架咋...今日去左食韓式五層塔, 都唔駛等. 食完出面都無人等.
      間野係北角出名, 開到去深水步....

      刪除
  10. 更正你係輝立話系統錯誤抽唔到ibond..實情係佢雖然出錯,但照俾返兩手我。

    回覆刪除
    回覆
    1. 咁ibond上市日有冇機會俾輝立搶高個價?到時借機高少少價出貨,希望每手可以賺多一兩百。:P

      刪除
    2. 哈哈,好多人沽貨!茶樓排長龍,因為人人有免費茶。。。。

      刪除
  11. 隻ZZ其實外形都幾好. 小小意見:滲線好似深色了些(尤其是面部)改用灰色效果可能更佳.

    回覆刪除
    回覆
    1. 灰色睇唔到...
      又要自己溝深色D....一字記之曰懶. 哈哈~~~

      刪除
  12. 男女主人進可攻, 退可守, 儼然立於不敗之地

    回覆刪除
    回覆
    1. 做乜成日比高帽我?

      生意唔死就係,如果生意唔掂就死硬。

      都係有收租樓好,租客一定準時交租0既~

      刪除

各位每個留言,係我繼續9UP動力,必覆。

Related Posts Plugin for WordPress, Blogger...