小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2015年12月27日 星期日

租金樓價進入惡性循環

呢篇應該一個月前出,不過一黎卦住砌高達,二黎未算太肯定,唔敢亂出文。

今日完成左

HG 1/144 G-SELF REFLECTOR PACK
用左MR HOBBY 珍珠色 (XC01, XC02, XC03, XC04, XC05, XC06) 不過影相唔明顯!





收租者建議回避,因呢d 都係我個人意見,絕無討論餘地,亦無興趣去辯解。

時間証明一切,又睇下我係咪老千。如睇錯,我都係雜魚一名,你想我點?

以下全為男主人觀察所得,全部係中原網頁睇。係直係假盤唔太重要。
話說,某區屋苑分四個grade

A 地鐵上蓋,新新地
B 無咁新,但用料靚,地點一般算就腳
C 地點同B 差唔多,但舊d 同質素爭d, 勝左三房單位夠細。建築 6xx 有套廁
D 老過男主人,又細又殘,唯一好處係平。

居屋村屋不計入內,租買成交都少,選擇亦少。

因A 類兩個屋苑都唔養貓狗,我未住過。但BCD 都住過。租樓好處之一,真係可睇送食飯,唔鐘意就搬。

以前,樓價上升軌賣家主導時,D 盤同C盤爭三千蚊,同B盤又再爭三兩千,同A盤又再爭多三四千。

即最高到最低爭成皮野。

如果收入中等家庭,例如搵六萬蚊,要再每月拎多5% 薪水出黎upgrade 可能難少少,結果焗住租D, C 盤,供求之下,當然令濕九細價樓,不論租定賣價節節上升。

上個月開始,變化出現了。

D 盤價好硬,可能做完大維修班傻仔以為增左值,其實天價大維修後變左舊居屋咁樣,只係比人過左一棟。

但C 盤有大量租盤湧現,而部份換樓人士亦唔介意平租,結果租盤一路減價,同D 盤相差一千。由三千spread 縮到一千。

重點,C 盤單位量係D 盤兩倍或以上,估計唔止。

B 盤量非常少,自住者眾,因交通一般,打工仔唔適合,但環境全區最好。結果久未見減價租/賣盤。

A 盤已經殺到落黎!租金差得番千幾二千蚊。

留意,A C 盤租金上有非常明顯跌幅。

即如果有多一千budget, 已可唔租D 去租C, 講明少少,如剛完一年死約,相同租金已可upgrade...

由C 去B , 仲有兩千幾差距。

B 去A? 千幾蚊,少於租金一成。不過正常唔會轉。

如手頭鬆動,又講到價,C 去A 都幾正。

D,變左賣剩蔗。。。賠了夫大又折兵。

最高同最低, 由之前一萬到而家爭六千!如人工不會變經濟不會差,只是樓價租金打回原形,會如何?之前樓價跑嬴人工,而家跑番番家鄉都好正常啊。咪天真到要人人陪你死至得架~~~!

男主人住B 盤,只要等待第一個減價盤便可以了,因交通不便,如差唔多價錢番工一族只會揀A住。B 一向少人問。

B 盤三房單位都係補多三四千,已有幾個放租,仲不停減緊無人理。即使full pay,管理費一個月都二千幾,差餉地租都未計。

這現象不是需求少左,只係當差價收窄,租戶或買家選擇多左,成為主導,一改之前焗買焗租的生態了。

其實,也應該多謝一下之前忍唔住手買左自住樓的人,令租屋需求下降。
同時,亦代上一輩多謝年青有為收租仔,無你地接佢地火棒幫佢套現的話,佢地即使租唔出,防守力都好強。

而家即使未跌到買入價,只要租約一完,現金流就會停。

刻下男女主人加埋cash only 已可full pay 屋苑D,買入屋苑B 亦毫無難度。

不過,樓市cycle 咁長,不用急於求死。

最後,近排去左OCEAN PARK,食野貴過入場,頂佢丫。



另一張,攝於九龍站。


女主人話,G Self Reflector Pack 好似中左毒, 其實係佢吸左敵人光束, 再放番出去攻擊敵人!



你估呢幾年先加入0既收租仔吸左0既租金可以頂幾耐? 同樣, 現在剩番未入市0既, 係時候可以係租金上討價了.

當刻下租金收入已經必然少過每月供款加洗費,當租金一跌,無人買黎收租,價又跌;無人租,租又跌。如你無租客,真係慢慢供完再大維修慢慢捱了。

28 則留言:

  1. 經濟唔好時守唔守得住就睇實力了

    回覆刪除
  2. 唔同地方的做法真係好唔同。香港樓明顯貴到誇張。有時諗諗,幾百萬得幾百呎,係世界好多地方已經可以買到幾千呎連花園連車房的大宅。即使對比其他世界的大城市,要用香港幾百呎的價錢買千幾呎的樓都唔係難事。香港樓究竟邊度值咁多錢,有時真係諗爆頭。

    回覆刪除
    回覆
    1. 因為供求問題無想像中嚴重,只係比人炒作。現在開始急回番正常水平,對實體經濟無影響,食店繼續迫爆,只有收租仔荷包要縮。謝謝收看。

      刪除
  3. 所以80後求死, 而家應該摺埋左.....呵呵

    回覆刪除
    回覆
    1. 無睇佢。
      佢咪又一味吹而家無得加按,又話佢仲。有幾多幾多水位,回報幾多,會港業主唔急賣,等急賣果d 出貨後會回穩。

      刪除
  4. 回覆
    1. 謝謝收看, 又睇下黎緊幾個月會點, 而家未到TURNING POINT...

      刪除
  5. 加按唔係唔得,收租都唔係唔啱。但係將加按同收租吹噓為「財技」,池某覺得只有兩種可能性:一係個市場傻左,一係吹果個…

    回覆刪除
    回覆
    1. 勝負都係TIME 同TIMING 分別. 反而道義上, 呢班人真係ON9 加仆街.
      立心不良, 天遣之.

      刪除
  6. 我認為依家樓價跌兩至三成先係正常水平,
    跌多過三成先叫抵買。
    不過如果經歷唔好,
    人工再減就要再低先抵啦!

    回覆刪除
    回覆
    1. 無錯,如經濟唔好,經濟跌一成,樓要跌三成

      刪除
  7. 對任何投資都不會估頂或估底, 但常識加歷史數據, 跌市大概3-6年既時間. 有耐性有現金, 唔驚冇貨買.

    回覆刪除
    回覆
    1. 所以不用見劈價就狗衝。今日低位,明日高位。

      刪除
  8. 之前俾市場氣氛影響勉強上車收租個D,呢次都幾難攪

    回覆刪除
    回覆
    1. 佢地最好快手甩左佢。
      唔好比機會早買入個班走得甩

      刪除
  9. 70後兄分析樓市真係幾獨到,正!

    回覆刪除
    回覆
    1. 我都係用家角度。
      有得揀,你唔減真係慢慢交下管理費先啦。

      刪除
  10. 我返而想知道'求死'嗰邊啲 pool 搞成點,早排樓巿熾熱時,課程提及夾 pool 買一堆單位改裝做賓館做成,諗住食正自由行條水同埋高鐵,好喇,家陣自由行縮水,高鐵又延期,我估佢地 pool 啲人,如果實力弱啲,都幾頭痕。當然,佢地好多時都低巿價 1x% 先買入,叫做有啲 buffer,唔會咁易俾人 call loan。但面對資金回籠延遲,心理質素差啲都唔掂。仲有佢地夾錢炒鋪嗰啲,面對零售業不景氣,真係唔知點算。

    買樓投資的,真係唔係想像咁易,真係要諗清楚你可以承受幾多,唔好淨係諗可以賺到幾多。咪係o既話,一用杠杆去做投資又高估自己承受能力的話,Hi 大鑊就有排追了。

    回覆刪除
    回覆
    1. 原來佢攪過呢d on9 集資。。。
      成功與否,都係陰質錢,而家賺,將來子孫受,或者自己老來受。
      從來我批評佢地都係道義上多於金錢上。
      而家市跌,只係提供食花生機會

      刪除
    2. 應該話佢地個投資 club。我喺香'梘'嗰時有上過堂,聽過佢地介紹。真心想睇下人地家陣點轉身,等我呢啲無知o既人學翻一招半式。

      刪除
  11. 正,終於等到70後兄出呢篇文!

    回覆刪除
    回覆
    1. 我都底九up 之輩。
      如再進入turning point,又再寫下。

      刪除
  12. 其實現在很多人還是覺得這只是小調整。劈價盤只佔很少數的,過了後樓市便很快上升再創新高(就像2013年那次調整一樣)。所以可能要多些時間才能確定這次是否turning point

    回覆刪除
    回覆
    1. 以其他投資品黎講, 例如股, 金, 油等, 兩個月跌一成已算好少.
      的確是小跌, 但係咪只係調整? 只要一跌, "陰質投資"價值一失去, 自然有排跌, 不過溫水煮蛙式慢慢跌.
      仲有, 跌完打橫行番幾年架! 2013 個次就係有班人教D 無乜錢0既人都去收租...而家2013 加入0既收租仔, 剛過左一年死一年生約, 自然嚇到尿標, 僅過到壓測, 一無租金支持, 要自己掏錢供, 比管理費差餉地租, 同切佢地J無分別.

      刪除
  13. 自己留言比自己, 今日已見B 租盤同C租盤同價了.
    所謂惡性循環, 並非迅速的, 所以你以為調整慢慢跌, 其實係人人諗住平少少, 點知動作慢半秒發現其他人更平, 出唔到貨.
    二月新年, 無人搬, 到時果班放租人齊齊硬食管理費同供款.

    回覆刪除

各位每個留言,係我繼續9UP動力,必覆。

Related Posts Plugin for WordPress, Blogger...