2015年7月27日 星期一

女主人的同學聚會

話說女主人讀一間唔勁又唔太屎既老牌女校,讀商科的。

上個月佢地理及商科班攪聚會,一班八十後女仔同老師傾番往事。

不過,女主人同我去左上海,結果無出席。

咁聚會又關佢乜事? 早兩日同女主人好友及其老公食飯,講番當日所聞。

咁既年紀,都係講事業,講下工作咁啦。

當然有人文員仔,又有人入big4 好正常。

理科無人做醫生,好似有一件中醫。

Big4 女有拍拖,女人事業有咩用? 得自己一個孤怜怜好慘的。當然why not both? 最好梗係兩者兼得。

講番佢個frd, 好似在pr 公司都撈得ok. 我唔知人工好pay 否,不過呢d 年紀會覺得有人under 自己係一種成就,而班上我估又唔多人撈到管人級數。

簡單d 講就係表面証供就是成功。

當老師又問到無出席的女主人如何,原來老師仲停留係佢做秘書仔年代。當知道佢生左兩年仲咁青春同埋已是一位小微企老闆時,講左句。。。

"佢兩個讀書時中下中下,估唔到而家變成咁。"

女主人事後同我傾番,佢歸納為命水好

讀書時都學過,"桃李無言,下自成蹊",你係得既,唔駛特登講。

例如某blog 標榜80後求死要買樓,又話樓價乜乜七七,平時佢都係76一條,多層樓都只係收租76一條。同學聚會都係同以往一樣無人social 佢,以為自己低調low profile, 其實係無乜長處。

仲笑人地著西裝番工自己攪收租屋著到裝修師傅咁,又一個讀唔成書笑人讀得書多無用。

可能有好多未有樓既70 80 90 後,一路好焦急買唔到樓/買唔到平樓/買唔到人地咁多層收租樓而煩燥不安,其實,其他投資更有so.

今日又大跌,提供機會比各位入貨。未收夠貨又可以小注買入了。

有讀者問15 年後,收租必勝。真係要15 年後才知曉了,其實小弟身為股友,股息夠交租同生活有突,進可攻退可守。

亦有人覺得兩三層收租,扣一半按揭的現金流就可自由,呢班應係絕後毒J一條。如有家庭仔女,一定唔夠,你日常毒男生活使費少咋。

如果佢地甘心做絕後毒男,咁呢個人生遊戲輸家應該係佢地

做到60 有仔有女有老婆父母健在,遠比一條友坐擁幾層細價收租樓終老吧,到五六十歲,你財務自由與否其實又有咩用?人地兒孫滿堂不知幾開心!

四十前退休,你得三四五層又做唔到,一樣要捱騾仔!未有樓的,諗清楚,其實人生遊戲上,你同佢條件依然一樣!十五年後,大家比賽既又唔係呢D野了!

與其日日諗下點加按做餅過壓測,不如實實在在識番條女計劃下你0既人生,考順下父母吧!

樓不是人生全部,要學會活在藍海思維。

我同女主人講,過多幾年,你地同學就不會比較工作,而係比較老公及家人小朋友了。

(希望唔好大個變豬扒....)


老婆話,佢會話佢老公,即係我,退左休。

我話,你d 同學會以為你嫁左個阿伯!

比較伴侶家人小朋友,難怪80後收租仔零亮點無人理啦。

(仲爭貼紙!!!)

(一人生日, 人人有禮物!!)


43 則留言:

  1. 做吓第一先﹗
    其實而家比黎都冇用...睇下邊個可以笑/串到最後咪嬴囉﹗:D
    BBQ

    回覆刪除
    回覆
    1. 樓D人可以睇到好遠景。股D人就大近視。
      人係奇怪的生物,真係睇下邊個笑到最後,最後笑的,真係最有錢果個?再者,收租仔根本唔多錢。。。只係借得多錢。

      刪除
  2. 回覆
    1. 哈,乜你次次都focus 左去我個女度架

      刪除
    2. 言兄,男主人要護女了;再講無相睇㗎啦:D

      刪除
  3. 有人說過, 某程度上, 快樂是來自比較,
    男人何嘗不是比較, 人工, 身家, 女友

    樓只係一個投資方法, 要錢滾錢0既, 五花百門..

    回覆刪除
    回覆
    1. 拿,後生比工作,大個d 比收入。
      如收入好但無女或醜女,是一種人生失敗。
      步入四五十,邊個會太窮? 十億同一億差不多。到時比家庭了。
      六七十歲,比健康,比仲有幾多朋友在生吧。

      刪除
  4. 有點感慨眼下香港人眼光focus太多喺「樓」,過度重視「樓」的「價值」,然而住屋問題仍未見有出路。長此下去香港前景真令人擔心。

    回覆刪除
    回覆
    1. 對的, 大家都被洗腦了.
      住屋問題其實不需要出路, 慢慢市場會調節. 你見唔到寫開收租便是硬道理個D求死, 講到無哂墨水(本身佢都無乜學識), 要學人講高息股咩? 一講佢就蟹左啦~
      同埋, 要死命去買樓個D 已經買左, 對我地呢D 睇住你黎食0既人, 更加安全, 更加容易有死雞執.

      刪除
    2. 大佬啊⋯⋯佢求死隊長最近真係笑差死人!教個有家底(多過5000萬以上)但無知覺的觀眾去買細價樓,跟隨自己下一扁文又說要防守會買高息股。真的自己死就好啦!

      刪除
    3. http://hk80captain.blogspot.hk/2015/07/blog-post_22.html .........高手過招!。?

      刪除
    4. 哈, 你唔出條LINK, 我平時都廢L事CLICK 入去(求死語氣係咁). RSS FEED 睇完得啖笑.
      佢得個三四球淨資產, 去教幾十球0既人點買野? 真係問果個係傻, 答果個不自量.
      其實80後求死都只係讀唔成書0既LOSER 之一, 由細到大都無人睇到佢, 而家難得跟著潮流買樓收租, 咪以為自己上左位, 仲去教人, 其實佢有冇自知?

      刪除
    5. 自己及身邊不少朋友深受近幾年租金 / 樓價急升之苦,未能及時買到自住樓的真是高不成低不就,希望捱過這幾年會有更好的日子。但明顯地市場是在悄悄改變中,而大眾及市價的反應往往慢半拍。由數年前用家大罵地產霸權到供應短缺再到現時二手交投淡靜,投資者漸少,大眾及傳媒每每後知後覺,糾纏於舊焦點之上。

      刪除
    6. 大眾傳媒一向是金主喉舌,佢想唱好唱淡都得。市民免費資訊太多,新聞紙當事實,真理本來簡單易明,只係太多人受消息驅使,攪到劣幣驅良幣。
      其實呢幾年都不算捱過,經濟好左,有人人工升幅追唔到樓價,但追到租金者不少,亦証明收租回報開始連投連險都追唔到。

      刪除
    7. 多謝70後兄的blog讓我平衡一下心理,找到一個靜思的空間。近年開始計劃置業,每日受各種資訊及市況影響,確實很難保持冷靜思考。

      刪除
    8. 可能最後樓價真係再升十倍呢! 咁仆都係一齊仆街0者. 你覺得如果係咁, 個社會會點? 我估...會有香港版文化大革命了. 再者, 香港人真係頂得住十倍升幅?

      刪除
    9. 其實求死自己立志去收租真的無問題,初期教人上車或1開幾都可以(讀者有實力又知道風險的話)。但佢漸漸真的走火入魔在blog又做通水喉、裝修及最笑料教人財務自由做顧問生意其實就是教人all in 買屋仔....開始期期都all in 自我感覺良好....真的吹Q脹!.....本新書又吹自己有幾千萬資產???當然冇話有幾多係負債.....唔講嚇死知就笑死。為了自己利益真係去到太盡啦!

      刪除
    10. 呢d 人最易露底,又唔係老人家,又唔係白手興家,仲要係毒J一條,如有幾千萬資產梗係去溝番幾條女啦,仲出書寫blog?
      By the way, 佢都出書,我可出十本了。

      刪除
  5. 聽聞98-03年期間反而有女唔想嫁俾有樓仔, 因為樓市不斷地向下, 嫁有樓仔等同要一齊負資產:|

    回覆刪除
    回覆
    1. 所以話,係香港做女仔根本係立於不敗之地!

      刪除
    2. 哈, 個班女人捱過了, 所以而家好重怨氣.
      郁D 就要COMPLAIN 人地個D 女, 咪當日覺得自己`捱過, 經歷過好怕失業個班!
      成日想令人無左份工, 其實年青人可能去創業發埋達, 他日睇住佢地D 仔女黎食....

      刪除
    3. 回覆雲地,要做靚女先可立於不敗之地。
      從來靚女有好多選擇,醜既得一個男人只能揀要或唔要。
      同樣男既可以溝到好多女,毒J又無專長既,十層收租樓都幫唔到你溝一件中等女。

      刪除
    4. 80後一代對失業及負資產的感覺很疏離,只有跳槽人工三級跳及樓供得掂唔怕坐艇的想法~!

      刪除
    5. 仲有,佢地通常都有父母幫手或者父母在職,始終後生一輩。60 70 後當年97 要養埋父母,相對擔子重d.

      刪除
  6. 同意70兄所講,現在有不少比樓更好的投資項目,回報率更高。

    有了自住樓,其實只是展開另一個階段而已。假如把這拿來做人生夢想,就真的會成為樓奴,因為你的人生,除了樓就沒別的東西。

    回覆刪除
    回覆
    1. 自住樓OK, 始終對自己負責便可.

      買十九細價樓收租, 計盡一分一毫個D 先係仆街. 仲大大聲講話要榨盡年青人租屋的血汗錢個D, 真係會有報應架!

      刪除
    2. 自己80後,都仲要賺盡自己同輩或後輩既錢,同地產 狼狽為奸, 談不上成功,談不上清高

      刪除
    3. 有本事0既, 應搵上一代人0既錢.
      至少, 我兩公婆0既主要客源(雖然性質完全唔同)最後生都70, 60 後.

      刪除
  7. 其實如果唔計想買樓,我既現金儲備可以做好多野,不過人有時就係咁,我反而一直都無咩想做,無咩想買/做,所以先儲到現金

    回覆刪除
    回覆
    1. 早晨。
      如果手持現金,係之前升市又忍到手,就唔駛做蟹了。而家唔少股,扣埋手續費同稅之後有近六厘回報。

      刪除
    2. 之前7月頭趺市入左d貨,而家再趺既話會入少少

      刪除
    3. 現在我買入一些比較穩健及高息既坐下

      刪除
  8. 佢呢排打算轉攻股市喎... :0)

    回覆刪除
    回覆
    1. 可能佢已偷偷入左市, 蟹埋.
      呢件野, 越黎越多人當係笑話咁睇

      刪除
  9. 反而想知版主有否諗過移民?

    回覆刪除
    回覆
    1. 不能說是移民。香港只是搵錢地。
      若有一日,錢搵夠,子女的夢在香港找不到,例如個仔要做科研,係香港只能食屎。
      咁就會帶錢離開。

      刪除
  10. 現在樓價好詭異,明明三,四十年樓,開價都成過三百萬(地區仲要係大西北), 啲升降機又殘,屋入面的水喉又廿年冇整過, 嚟緊大維修每個單位起碼夾5位數字……你叫我比1球做首期再個個月供7,8千蚊真係唔捨得。

    就算樓價係不段升,呢一刻買樓,學早前係fb睇過一篇文章,好大機會係「嬴左得個殼,輸左好大鑊」。

    回覆刪除
    回覆
    1. 人總係對遠景有期望, 亦覺得係一種浪漫.
      當年都話匯豐有買貴無買錯, 又叫後生仔月供股票, 到老個陣股價升收埋股息回報好高云云.
      係我個CASE, 六七百買黎住, 不如租, 用錢收息儲起佢又得, 再搵機會投資又得. 正因股息己COVER 租金, 所以一D 焦急心都無, 加上兩邊小生意都係食上一代人的錢, 佢地收番黎D 租, 都係要乖乖交到小弟兩公婆手上, 老婆可能都少少受氣, 我份生意一下趕客令, 佢地仲慘過比人加租...
      租屋可以租第二度, 但係我D 炒旦幾乎係獨一無二....

      「嬴左得個殼,輸左好大鑊」金句!

      刪除
    2. 就係小生意, 至於係乜就唔講得. 總之係正當生意不偷厄拐騙.

      刪除

各位每個留言,係我繼續9UP動力,必覆。

Related Posts Plugin for WordPress, Blogger...