小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2015年4月16日 星期四

最沒信心的事 -- 傳承

終於完成, GUNDAM AGE 三爺孫, 會場限定電鍍版!! 唔講你唔知, 加埋千幾蚊...仲要好難買.



閃令令好難影, 呢張叫做最好了...

見千萬兄話想聽女主人0既故事, 梗係等佢自己寫好過我寫啦. 其實佢只係一個普通OL, 亦有著快樂童年.

男主人0既由細到大, 好多決定都係自己揀. 可能父母唔識, 又或者唔係好特別操控我. 由高小開始就可以自己做想做0既事.

選擇中學, 我想做 BIG FISH LITTLE POND. (原文)

選擇工作, 一畢業我已經唔打算做番自己專業(今年又要續牌, 年年續年年都唔用). 係搵工難到爆0既2001年, 個個人工幾千蚊個陣, 放棄(或者我都搵唔到)近兩皮野0既本行.

屋企無過問, 事實上, 以搵錢同自主性計, 今日睇番呢個決定絕對無錯. 當中當然少不免辛勞, 但並不辛酸, 亦唔算得上咩血淚史! (儲個首期就血淚史, 個班人實在太溫室小花...)

中間我有一年去左做另一份半專業工作(又係同本科無關, 但係我做到的), 或許家人以為我終於穩定打份工, 其實我只係想實現下兒時0既"我的志願"

後尾"被選擇"唔做, 專注走番舊路, 又一番新景象. 其實當時可以繼續做半專業打工仔...

直到今日, 選擇0既時機又來了!

唔係選股 (近日太多人講股了, 中信射倉好Q慢.), 而係我究竟敢唔敢唔撈.

留言有人話, 除非徤康問題, 否則無可能停; 又有前輩話現刻資產水平太低, 未必真係可以財務自由.

射哂貨去一通準備交貨. 只係排第二十名! 哈哈~


我仲有一年多時間去諗, 究竟一刀切, 定係再減日數. 如日數再減, 就變相幫手交鋪租, 又何苦? 同埋數目效應, 生意量少會令生意越黎越少, 值唔值得咁做?

如無意外, 個女應該讀緊小一, 個仔應該K2...是否留低陪下佢地好D? 終極係我老婆都TO BE FREE.

係同時比選擇0既自由比子女情況之下, 我希望可以將"唔跟大隊"0既人生路, 傳承比佢地. 做人父母0既, 梗係希望佢地走得遠過自己.

小弟0既夢, 其實可以達到0既都七七八八, 因為人小, 所以夢都容易做到; 希望佢地可以走得更遠, 夢想更加夢想.

有好多野, 錢係買唔到(廢話!), 例如要係戈壁沙漠生活, 錢唔係唯一要求. 要做太空人, 科學家, 無理由留係香港.

只係, 我, 女主人, 同埋大家, 習慣生活左係呢個物質充裕, 資訊物流都方便0既MATRIX 之內, 離不開又捨不得. 只能任人屠宰! (你加租一樣可以屠你架傻仔! 你吸空氣就飽?)

錢於我而言, 輕於鴻毛 (不則我會乖乖做番老本行, 有份只能供樓人工, 去下旅行0既假期日), 若家人能接受, 其實已經可以簡單生活.

人生在世, 最重要是什麼?

是鄧小閑有十萬股(而家講二十萬股)匯豐銀行? 定係有一層自住N層收租樓?

我估小閑兄最重要係想"閒", 而非"鄧" (請GOOGLE 一下)

究竟係人地過唔到自己個關, 定係我份人退縮?

想比好0既生活環境家人, 真的要用錢同錢同錢? 是陰謀嗎?

精神傳承, 勝於萬金, 錢幾時搵都得; 但係讀過0既書, 做過0既決定, 千金難買.



舉個實例, 小女個樣都OK見得下人(唔知似我定女主人啦), 老師都想選佢出黎表演帶班舞. 如果一路長大, 會遇到不同異性及同性, 如何面對, 只有經歷過呢D 事0既父母先有經驗. 別人本是豬扒, 同你講感情事點處理, 跟本唔VALID! 因為大家情況絕不一樣.

投資如是, 讀書亦如是. 因為腦袋人人不同, 只能靠上一輩傳承.

25 則留言:

  1. 你3328做咩塗咗啲數字, 計到嫁喎. 考試?

    回覆刪除
  2. 又想起漁夫同商人的故意, 各有不同的想法, 無話邊個錯邊個岩, 當然, 知足常樂我覺得是千古不變的。

    回覆刪除
    回覆
    1. 果個故事係,商人搵錢都係想做漁夫。。。
      無話錯0岩。不過好多人未自由就睇少慳慳地可以自由既人。

      刪除
  3. 條數好易計姐, 如果放下工作:
    支出= 屋租+日常支出+小孩學習費+父母生活費
    收入= 股息在最壞情況可以減半, 而股價都可以減半

    如果收入減去支出, 還可以儲起一半就掂啦 !

    回覆刪除
    回覆
    1. 哈,如市跌,可以拋番個身出黎做既。
      好多明星都係咁。

      刪除
  4. 價值觀確實是 "被灌輸的"

    有條件退下火線....係一件好事黎....正....

    回覆刪除
    回覆
    1. 我唔信身教,因為自自然然就會學到。
      有D野,係要明講,佢唔跟有自己一套更好~

      刪除
    2. 社會上95% 都係跟風,
      只有 5% 會是有自己的想法的人...

      早0的放手俾佢地闖就會學到.....

      刪除
    3. 放手比佢攪,都係一dd人成功架咋。

      刪除
    4. 至少是自己選擇的, 冇得怨....呵呵...

      刪除
  5. 謝謝分享﹗
    又領教一大蛇疴尿的奇境﹗

    決定財務自由後,規劃往後的生活,亦係一大難題...:D
    BBQ

    回覆刪除
    回覆
    1. 我呢D只係小蟲。只是一條看得簡單0既小蟲。
      財富令人貪婪。

      刪除
  6. 退下來跟向上流一樣咁考智慧。 家庭,工作,朋友圈,興趣及精神寄托樣樣要佈局好。
    我也是在慢慢一步一步減工作的量及時間。 日日食飽飯無事做, 時間日子會好難過。



    回覆刪除
  7. 慢慢再諗下當生意點攪,
    話唔定到時又有另一返睇法。
    我屋企無咁多位擺模型,
    不過最近睇到d高達扭蛋越黎越精美,
    重俾我抽到隻最愛z高達,
    遲下post出黎俾你睇下。

    回覆刪除
    回覆
    1. 有高達睇梗係好。
      Fb 有扭旦交換買賣區架。
      另外,我d 模型開始要放係公司了。
      生意已千錘百煉,無得攪,只能光榮退出。

      刪除
  8. hi 睇左小小你個blog, 好勁, 我就岩岩先出黎做野, 人工仲要低過14K, 之後都唔知點過

    回覆刪除
    回覆
    1. 你好,我第一份工同第二份工(2001 年後),人工都唔過10k. 路是自己行出來的,平坦的,穩定的不一定是好。
      趁仲後生,咩都試下做下,搵一樣你最熱愛既工作或生意,自然會做得梗好。
      加油。

      刪除
  9. 塘人都係諗住先讓老婆退然後自己也退,不過現時為止十劃未有兩撇:)

    回覆刪除
    回覆
    1. 佢生意起走遲過我,未到做到厭階段。我退先。

      刪除

各位每個留言,係我繼續9UP動力,必覆。

Related Posts Plugin for WordPress, Blogger...