2015年2月14日 星期六

尋找蘇眉的故事

BLOG 文預告
17/2 等待論: 股市鱷魚 樓市水魚
19/2 新年比人問搵幾多

女主人真係由得我癲...哈哈. 我買完都覺得我好毒....


二手的 GUNDAM 波子機...我估香港絕無僅有! 打算放係鋪做裝飾, 就好讓我黎緊兩年幾工作開心一下吧.

近40 KG....女主人真係力大無窮. 佢搬多過我搬!! 抵比佢玩先0既~~~

話說, 男主人條命都算係咁, 暫時到呢一刻都順風順水.

工作? 當年搵唔到工好正常, 打份垃圾工又好正常, 無錢都好正常喎! 我仲後生...而家諗番, 好彩我無做打工仔咋.

事業? 同我同科畢業0既, 搵到錢個D, 全部唔係做番相關工作. 專業人士都係WORKER, NOT PLANNER. 技術隨時可被替代的.

感情? 我只能說, 每次都係塞翁失馬.

相比R 兄, 我估我受0既挫折少好多, 人生中無試過爽歪歪地絕地反彈, 只能說, 一切就同選擇一樣, 一如預計之中. 因為我最鐘意行人地唔行個D 路, 逆著風走, 望番後面D 人, 原來順風更慢.

話說, 當年初戀情人, 住居屋, 都唔係有錢, 或者我唔做番本行, 好似無乜出息. 走左, 其實我都唔係好有感覺. 反而覺得, 走左都好丫...大家價值觀實在不同, 讀個科一定要做果行?

第二任女朋友, 對我特別的好, 只係當時我讀番書, 有機會轉去另一穩定行業工作(我可選兩個功能組別...) 站係人生交叉點之中, 知道佢想要穩定生活, 但係我自己好肯定想繼續走小路. 只能分開不要浪費時間...

我曾經懷疑過自己, 條路走到一半, 掉頭又唔係, 再行唔知會點. 當然, 反正當初自己一無所有, 走到一半已好過唔少人(2004)! 自己一個人, 只需向自己交待呀!

所以, 當你地話有女主人支持個陣, 我無否定, 但係自己一個人, 會作更多嘗試.

之後劇情省略啦, 因為事業開始似樣, 感情亦都"有得揀" (其實一向有得揀, 男主人死剩把口).

無奈未有任何一個, 可以消除自己"一個人"0既感覺, 因為由細到大我都一個人決定自己0既事(家人又會好放心比我決定喎!?) 期間亦有女仔追下我0既, 不過我超唔鐘意打算搵個好碼頭0既女, 當時相同年0既人係搵到錢, 但我已開始單人財務自由之路...

(你有樓1234 收租? 呢D 女應該好鐘意你, 帶定樓契去見佢啦! 咩話? 未FULL PAY 仲係銀行KEEP 住? OH NO!)

直到遇到女主人, 樣好就唔在講 (話哂佢個髮型似吳若希, 哈哈!!!), 最有趣0既係, 佢會同我癲...至少, 佢存在以後, 每當工作上我想放棄之時, 我會試下撞多幾次, 最後又撞到出路喎!

最緊要係, 
當自己知道唔係一個人0既時候, 
就更加唔無有怕.

同樣地, 當佢想攪點小生意個陣, 我都同佢講, "最多蝕租, 我比番你."

估唔到, 三個月就回哂本了.

有BLOG 友以為男主人靠女主人科水先頂得到D 期權倉虧損; 同樣地, 現實生活D 朋友又會以為女主人靠男主人強大資金撐主.

其實個個都錯了....

男主人工作全靠IQ, 以及個種自信自負0既性格...女主人最大幫忙係鼓勵左我幾年前同拍檔拆伙, 收入再提升....

女主人工作全靠佢EQ, 以及佢對人好人對佢好0既態度. 仲有佢個樣生得比較林善, 個個都唔想蝦佢....哈哈! (早排佢入院, 個醫生以為佢妹妹仔無錢, 想收佢平D...). 男主人幫到佢0既, 就只係電腦上可以幫下手...

所以, 我地其實只係各有各做. 互不干預才有如此美妙效果!

真正令我地可以走埋一齊0既, 其實係一種蘇眉 (SOULMATE) 0既味道. 你比我再搵, 我估都搵唔番一個女人令我可以放心同佢乜都講.

自從我個"PROJECT" 加埋女主人入去之後, 我覺得複雜左好多, 因為同時要滿足兩個人一D 都唔容易, 我依然在尋找中.

或者, 呢個就係我想快D 停手上工作0既原因, 再一路老落去, 大家享受日子0既時光越短了...


早陣子女主人又入廠檢查, 結果又係無乜事. 希望真係無乜事啦....要檢查0既都檢查過了.

8 則留言:

  1. 原來蘇眉係SOULMATE, 開頭仲以為要講西貢食魚:)

    回覆刪除
    回覆
    1. Hahahaha. 唔知邊度同幾時開始,蘇眉呢個term 已被人大幅使用,不過就不會絕種。

      刪除
  2. 人生苦短, 有人明白自己真係好重要, 好彩就遇到, 開花結果,奈何大部份人都係..尋尋覓覓...

    回覆刪除
    回覆
    1. 要搵,梗係要又明白又靚,唔明白都。搵個靚架啦。
      要黎供樓既港女,有咩用。

      刪除
  3. 回覆
    1. 後生個陣,口甜舌滑,有點事業心,唔難。
      就似d 人搵成長股咁,其實可能係老千股。

      刪除
  4. 預祝小小生意人兄羊年如魚(soulmate)得水,哈!

    回覆刪除

各位每個留言,係我繼續9UP動力,必覆。

Related Posts Plugin for WordPress, Blogger...