2014年9月15日 星期一

我的藍海一: 我的生意像澳牛

網絡世界, 一不留神, 可被起底.

女主人叫我小心, 當然我都好小心.

不過, 有時候又會諗, 起左又點, 若然能夠令我狠下決心唔做呢行, 可能都係一種解脫....

因為行頭細, 所以撈左一段日子已經有小成, 工作亦幾近飽和, 應接不暇.

相比女主人, 佢D 客入面會有麻煩客人, 真係獲獲新鮮, 無賴者眾, 惡人亦不少. 少則R 電視框, 多則話上網唱衰你....當中是否粗人? 非也.

我深信, 仗義每多屠狗輩. 反而越以為自己讀得書多, 但係無乜錢個D, 先係最無賴. TVB 厄你架咋, 有錢人好多都好有品. 或者咁講, 佢地都唔在乎個少少著數, 亦都明白, 有好多野唔係老細控制得到. 大家取其共識, 你好我好0者.

佢小茶飯上0既事務, 我係好難明白0既, 因為我0既小茶飯同佢剛剛相反!

*****

我D 客呢? 個個都好比面我, 又有手信, 又有月餅. 近呢一兩年有D 客仲特登上黎見下我, 睇下我咩樣!! (SO FUNNY! 佢地覺得我好似變魔術好神奇...想知我係個咩人, 其實就係T SHIRT 牛仔褲0既中青一個, 行過樓盤都無人SELL 我個D)

去到呢個境界, 自然可以選客人...只要貨物靚, 抬錢都會黎買黎搶.

當然, 我又唔係澳牛(請GOOGLE "澳牛 高登"), 我又唔會咁串0既....



同澳牛相同0既係, 呢幾年生意自動飛埋黎唔駛憂, 都幾好, 不過就日日做到無停手了.

其實, 我呢個茶餐廳侍仔, 係非常ENJOY 呢個工作, 只可惜一做N 年, 已覺得好悶, 我知咁樣唔係好0岩, 就好似係冷氣房度話做乜咁舒服一樣. 直到今時今日, 我都覺得好開心, 做到好HIGH. 人生有樣咁0既工作, 其實好理想, 完全無壓力又有錢唔受氣工時又唔長...只係我覺得悶.

你睇我好, 我睇你好!

********

我0既小小茶飯, 要由大學畢業開始, 當人人搵工0既時侯, 我發現, 其實一早發現, 我並唔鐘意本科工作.

回想當初, 放棄唔出黎執業而去做D 九唔搭八0既工作, 係大學同學眼中真係十萬個看我不起, 其實當初我都唔知想點, 只係知自己乜都無, 點解唔乜都試下?!

結果一年內, 我已經追到一般同學0既人工, 其實只係經濟唔好, 佢地都唔係搵得多.

我依舊死做爛做, 乜都試下, 點知唔知由幾時開始, 每月收入D 錢越黎越多, 我再無同佢地去比較, 因為我知佢地追唔到我之餘, 我有更好目標. 當時做一個月可能係佢地兩三個月人工, 已經覺得好爽....

轉眼又過左幾年, 我發現無論佢地如何升職, 升到最高級, 都唔及我一個月死做爛做咁多, 以錢而言, 當初選擇也算正確吧. 我阿媽久唔久叫我搵番份正職, 其實佢唔知我做緊乜...

至於亂九投資之路, 大約八九年前(2005), 我從朋友身上學識左買股票, 原來只係按個制. 朋友係價值派, 當時大圍都興講呢D, 我咪又聽下. 發現原來自己係可以快人一步唔撈, 只要慳慳地.

近呢幾年, 經濟好到不得了, 生意好到去一個我無諗過0既程度. 同時我當初以為我呢份工作, 做十幾年就因某D 完因要被迫退休, 點知今時今日依舊繼續.

澳牛精要, 乃忌廉炒滑蛋! 我已經唔記得我個一次去有冇食過, 不過做呢D 特殊市場, 就係要去一D 無人知0既藍海! 人人做茶記, 點解得你排長龍比伙記鬧都仲要食?

我呢個藍海, 其實不止我一個(忌廉炒蛋都唔止佢一間啦), 見過有D 人真係好串, 趕客啦, 鬧客啦, 係佢面前除衫嚇佢...嘩, 真係好奇怪. 結果換黎0既報復都係成正比, 因果循環吧.

眼見兩三年前市場開始有類似0既野出現, 開頭都煩過, 後尾打探後發現, 係呢段日子, 我0既PRODUCT 不停進步, 你忌廉炒蛋咁簡單? 我連外脆內軟0既多士都研發埋啦...每年我都有新野, 你點追?

當上有父母, 下有老婆仔女個陣, 發現當初個銀碼唔係好夠, 唔緊要, 又再做多兩年LAW...物價升幅唔夠我快, 租金升幅? 女主人話, 坐少D 的士已經等如番個數目了.

我係D 好簡樸0既人, 唔駛好大洗, 夠用, 夠去比屋企人生活就得. 希望係人生路上, 可以活出一片藍海. 人生在世未必要追逐一D 人人以為必然需要0既野(就似我當初畢業, 一定要做本科咩?), 例如車, 樓, 同埋番狗, 如果要七老八十先去旅行, 先去做自己想做0既事會否太遲? 人生有限, 一般人為錢奔波日子都好長, 結果一D 好無謂又想做0既事就擱置一邊, 如果可以仲係年青0既時候去衝衝衝試下, 你話幾美好呢?

如果可以工作0既年數少過讀書0既年數, 其實係人生成功一事黎0既.

P.S. 女主人0既生意, 看似紅海一片, 其實都係藍海黎. 就係當初發現藍海, 先至能成為小茶飯.

28 則留言:

  1. 可否透露一下即是關於提供咩類型既服務 ?

    回覆刪除
    回覆
    1. 我無講過係服務。叫得做藍海,就係你估唔到可以搵錢既東西啊。

      刪除
  2. 仔女供書教學須好多錢, 我就係要等到三個仔女讀完大學, 才能真正的儲到錢, 因為之前的資金都放在投資上; 所以你須等到資產翻多一番才能退休:)

    回覆刪除
    回覆
    1. 我等唔到double 了。再double 就太奢侈了。
      最多慳d 洗。

      刪除
    2. 有無諗過股價可以跌一半, 而股息都可以減半 ?

      刪除
  3. 做生意真係儲錢快好多,我之前做生意儲錢,比打工快幾倍,不過因為某D 原因,依家打返工,希望遲D 可以有機會東山再起﹗

    回覆刪除
    回覆
    1. 打工快唔快真係唔知,不過如果生活費要一萬,人工二萬,每月只能儲一萬。
      如果做生意有五萬,每月就儲四萬,一個月等於打工四個月儲既錢了。

      刪除
    2. 做生意可以賺好多錢, 但有代價, 就係辛苦又多麻煩野, 所以我叫仔女唔好做生意, 好好讀書搵份高薪工作, 又可以有假期不須綁死自己 !
      所以乜野都有利有弊 ! 世上乜都有代價 :)

      刪除
    3. To: 70 後:做生意搵得多,真係賺個風險溢價~
      To: Lisa:做老闆確實係好多野要煩,無時無刻都會有種備戰既心態,個種不安感令到做老闆既人被迫比打工既人精明D,所以D 人成日話做老闆醒D 其實係迫出黎~哈哈
      有D 人如果唔想成日諗咁多,打份筍工又唔錯GA,始終唔係人人都岩做老闆~

      刪除
    4. 我工作已進入無風險境界了...同埋, 筍過番工好多的.

      刪除
    5. 你個份簡直係神級啦,不過要好似你咁,係個方面咁出色先可以入門LA~

      刪除
  4. 我估是手作技術,一種興趣及嗜好的組成、改裝及美化增值等服務,
    男人的興趣,離不開.......?Anyway, 好好守護你的秘技及行頭,市場一知有油水空間,
    總有膽正命平的複制人會出現。




    回覆刪除
    回覆
    1. 哈哈, 無咁易比你估到0既.
      你都唔係打工仔呢, 得閒多D 黎, 交流下~~~

      刪除
  5. 做老闆都係happy
    真正的多勞多得

    回覆刪除
    回覆
    1. 係爽的, 自己想點就點, 不過同打工一樣, 為錢份上, 頂硬上.
      唯一好處係搵到就係自己, 蝕又係自己.

      刪除
  6. 可否介紹邊間証券行孖展利息平?
    同埋BLOG主你供緊樓,再借P LOAN咪好易過人工一半?
    希望你有空賜教

    回覆刪除
    回覆
    1. 我用銀行的OD.
      証卷行問過, 耀X 個D 要借幾千萬先算平.
      善用稅貸吧.
      (可問問一X 同埋輝X 0既)

      刪除
    2. 我見銀行的OD都唔平..買出買入手續費又一大蘿.....又要存倉,存入費...總之就多蘿蘿...
      同埋銀行有得比你做期權?定係你係証券做,之後射出射入?

      刪除
    3. 銀行OD 無咁易斬. 你預4-5厘左右吧, 同樣道理, 小心加息.
      買入賣出係用證卷行, 射倉就得, 都OK 快攪掂. 有空另出新文章講下.

      刪除
  7. 我看是服務性行業,與健康有關的 :目

    回覆刪除
    回覆
    1. 真係唔易估的. 好似執紙皮阿婆婆咁, 你估唔到每月可以執到十幾廿萬紙皮!
      不過你中左, 我本來應該係醫學人, 不過我放棄左!

      刪除
    2. 執紙皮也很好呀,你執紙皮的收入已多過絕大部份打工仔,包括專業人士!

      刪除
  8. 男主人,你選3328的原因?是不是因為AH股差價最低?

    回覆刪除
    回覆
    1. 唔係啊。其實我只係亂黎,一路買而佢派息又幾好,所以不會以分析/價值投資自居。
      最初買個陣其他內銀未上市。

      刪除
  9. 你本來應該係讀藥劑既,

    回覆刪除
    回覆
    1. 讀藥劑就屎都無得食了。。。
      其實估黎又有咩意思呢,畢業十幾年,本科係乜都係過眼雲煙。

      當下工作,人生成績如何,才更重要吧。

      刪除

各位每個留言,係我繼續9UP動力,必覆。

Related Posts Plugin for WordPress, Blogger...