小弟在DISCUSS 並無出文
你回應緊0既,都係一個有心引你派膠0既人,並非小弟。
若有人以為我係DISCUSS 出文引HATER, 是否太小學雞?
小朋友, 暑期放完好耐了. 好好努力上班吧...

2017年12月5日 星期二

第二次捐款 捐書保良局

平時好日我都唔覆EMAIL,因為大部份都係問錢錢錢。

老老實實,我又怕教錯你,同埋我D時間心機用黎做更有意思0既事好過。搵錢都係為左買時間,掉番轉花太多心機去投資,不如主攻本業。(好似求死人工唔高可以另當別論)

近日想解答呢一個
你好,作為你讀者,我有興趣想知怎樣捐款到保良局學校圖書館,你覺得用什麼形式去捐去保良局較好?例如助養定一次性捐款較好

JXXXX

其實好容易,你走去是但一間學校,話想捐款但想指定捐去這一間(正常都唔會拒絕你),你怕佢問長問短,咪話你自己係舊生。換句說話,捐番自己母校其實最方便。

至少,咁樣少左益果班行政人。

我比較簡單,捐番比讀緊/讀過0既學校又得,係銀碼比較少,怕麻煩到校長/文職人員要上報拎批准0者。

另外,估唔到有人EMAIL向女主人伸出援手想低薪幫手做PART TIME(BLOG中有愛!),覺得老婆太辛苦?不過真係子非魚焉知魚之樂。

係果位同事放產假期間,有一眾PART TIME妹妹仔幫手,自己獨挑大旗,以前初創業0既成功感番哂黎。呢個都係我預料之內。

錢固然重要,同時成功感同存在感更令人將事情做得更好。

男主人工作長期都有呢D,只係覺得有時候總要有個盡頭,同埋多D時間陪屋企人,所以先想唔撈。

以下是第二次GOOGLE AD SENSE 捐款收據。

上次捐款去左邊?

ADSENSE作捐款 遲來的收據!



近月無乜UPDATE,所以善款數字較慢,估計要到三月先夠數。有機會的話,試下東華三院。

(其實,EMAIL問非投資上0既野,我係會答你的。)

2017年12月3日 星期日

化療始動 我可以唔撈嗎 35

講家母

家母已出院,各位有心。

出得院,即係戰場已經轉移陣地,要正面同癌細胞作戰了。

都係果句,不用安慰了。正如我太太一樣,默默地在旁幫了好多。

有時一個人是容易生活一點,係某D位,都係要一個伴。(側面估計某前輩MARBO兄應蜜運中,呢半年講煮飯仔多過投資呢。)

想幫手?幫我捐錢吧。

上一筆GOGOLE AD SENSE已全數捐與保良局某學校,作為圖書館購書之用。一共八百元(咁樣捐就唔駛扣行政費!)。收據今天剛收到,待下一篇網誌才出吧。

又另一篇預告,請工人。係,得番外母一個幫手只會令外母健康變差,在此多謝風兄介紹佢請工人個AGENT比我,真係好多女(傭)揀,同埋其中一個員工係當地人,信心保証。正所謂,WHATSAPP谷(菊)中有愛。

只能講,外科病房同腫瘤科,真係兩個世界!無論環境、待遇同埋LINE OF THINKING,都好唔同!BY EXCLUSION,家母診斷為原生腹膜癌,算是比較少有0既個案。唔知因為人事關係定係個案罕見,有幸得該院副顧問醫生診斷。

好簡單,只係一個腹水問題,外科病房只係講無能為力,因為抽腹水有危險(法國醫院都抽過),上到腫瘤科,唔夠一日已經有陳醫生(我老豆覺得佢好巴辣,我反而覺得佢講野堅定喎),用手提照聲波睇下腹水位置同多少,決定量少唔痛唔駛抽,前後唔駛十分鐘。

最估唔到係,另一位蔡醫生(我無見佢真人,只係IN WARD CONSULTATION來過),同我電話講,腹水同腳腫好可能係唔夠蛋白質引起,我即時醒起我媽無胃口只食飯同菜。(一言驚醒!)

即日叫佢食左醫院0既蒸蛋白,第二日已經消左一半腫。

外科D4病房既醫護人員,撫心自問,係咪真係咁忙呢?一句說話有時已經幫到病人,唔識,咪問下人LAW!唔需要下下用程序來回應,尤其單嘉恩醫生,入院兩日,從未睇過我係私院帶過黎0既PET SCAN REPORT!如無記錯,家母入院三次,由好轉差,間接係佢一手愛理不理做成。

當年我無做,一黎唔鐘意,二黎無PASSION,如果你都無PASSION,不如唔好做!你不停同我講程序,講自己無做錯但又幫唔到手,究竟佢有冇任何愧疚?我唔係要追究,我只係覺得,因你而DELAY又兜左一大個圈,想有一個EARLY TREATMENT。(其實已經唔EARLY)

左手前臂瘀黑就係D4外科果邊抽血搵唔到血管造成。
真係出入咁多年咁多次醫院都未試過咁慘。。。真係咁忙?
(圖中已是腫瘤科病房了,環境好好多。)

首天化療,家母無任何感覺。不過聽聞副作用係兩三天後才出現。因多天無落過地,最大問題係行唔到幾多步,留係屋企就行得,出街就唔太安全了。

講工作

十二月我輕鬆中有忙碌,年年都係咁。今年感受比較深都係因為家母。不過,一早定左0既三星期長假不變,想同老婆去個旅行(長州也好),又睇下有冇機會。本來過往作風係十一月會準備好十二月0既野,不過今次因家事而臨急抱佛腳,暫時還頂得住。

女主人個唯一一個員工呢,開始放產假。當一般DISCUSS打工仔鬧老細0既時候,又有冇諗過你放產假特登較到放埋個農曆年,其實好影響公司?呢D少於五個員工0既公司,少一個人其實好大件事。請你番來幫輕一下,結果成日要就番佢。。。

出糧唔係大哂,不過你著數哂又係咪應份?

講投資

女主人倉位無變,沽左中海油,剩番不肖子中石化!

男主人動作如下

SP GLD 十二月頭轉倉一月頭,收權金HKD4700。
BKR 8.25遇到FULL CALL,買入價104,CALL價100。其間15個月共收息10蚊多D。(計埋得5厘,減息後得3厘!)
SC 939 變廢紙,HKD7000權金全袋,佢唔升番上7蚊都唔會開倉0既。

BKR被贖會回後,好大機會買隻BB BOND。KEEP住貸款為1000萬港元。

最後,剛剛星期五債價回升唔少,估計同今日星期六美總統通過新一輪稅務措施有關。

講資產

女主人本月430萬(上月427萬,月中計,十二個月平均每月增長九萬幾)

受惠於債價回升,男主人無啦啦淨值高左!(其實上月小兒CT SCAN及家母私家都駛左八萬蚊,其實收下債息都抵消左筆數)
男主人本月234萬(上月217萬),其實點計?
(所有戶口總值-貸款-建行市值)
即係話,佢係我IB收息組合同手上現金0既淨值

現時家庭淨值過二千萬,唔撈之日,一年半後,應過2500萬。

家母曾是我努力認真的原動力(我就是喜歡日本動漫中求求其其又過關的主角)。
或許,人生中,有好多人守護不到,亦同時有好多人需要守護的。

好好彩,我揀左一樣可保障生活,又唔係捱騾仔0既工作,唔駛好似求死咁成日寫BLOG講D人努力打工ON9。(我覺得係存在感問題,你份工無成功感,只有收租樓比你自己覺得高人一等,咪鬼笑人地啦,其實最值得取笑係你求死吧?)

兩姐弟一齊打街機,估唔估到咩GAME?
美少女戰士呀!而家佢地可以雙打,我唔駛幫手。
不停入COIN直到打爆機!

最後,小女首次考試成績唔差,全歸功老婆同佢溫書!高處不勝寒,呢條路有排行。第幾?有機會再講。

2017年11月29日 星期三

家母抱恙 原生腹膜癌定卵巢癌?

平伏了好久,才想寫低近日事情。

一如我每月月底0既"我可以唔撈嗎"一樣,非為晒命,只希望每當有人GOOGLE 呢D字目0既時候,可以搵到呢個BLOG。

十月份連續兩次入急症,都比醫院DISCHARGE出黎,最後去到私家睇(法國醫院,用我AGENT介紹0既潘子聰醫生主診)。

乜都未做,已經首先開通"醫健通"功能,等私院可以睇到公立醫院方面0既病歷同所做過0既掃瞄!(建議求助無門0既,必需要開呢個!)

一睇報告幾乎已經唔駛做本來要做0既野。公立醫院睇漏左又或者唔講比我地知吧。。。

腹膜充滿點點陰影細胞,即係話,癌症。

而公院因為姑娘溝通問題,腸鏡結果係入唔到,唔係照唔清!就係咁,我媽好慘咁又捱多D瀉劑。私院一樣入唔到。

最後用個PET SCAN(由頭到大比),CONTRAST 下腹。唔知咩黎由佢,用黎睇放射性葡萄糖UPTAKE,可睇通大部份嗜糖0既癌細胞,收費萬八蚊,呢個非常之值,亦係今次我媽診斷幾乎最有力証明。

潘子聰醫生算係幾好,知我媽無保險COVER,BOOK左津貼病床比我媽。連其他雜費一律打左個折,醫生巡房錢都平左,無必要佢唔會出現講兩句就算。可惜PET SCAN 無特價,我阿媽要轉番正常大房住。

咩癌?呢個真係一個值得GOOGLE 0既故事。

PET SCAN同公立醫院超聲波及CT 都搵唔到源頭係邊,由鼻咽到大腿骨!(呢個亦係公立DISCHARGE我媽0既原因!),連潘醫生都覺得奇怪。

跟據CA125指數(其實極唔準),正正路路就係卵巢癌,不過係卵巢完全搵唔到。

潘醫生話,可能老人家呢個器官縮細左,驗唔到。

講到呢度,要講下計存活期。

成日聽人講末期末期,其實就係STAGE 4。指標係,癌細肥已經擴散到其他器官。

例如胃癌,胰臟癌,腸癌,卵巢癌等等,最後期會擴散至腹膜,同埋有腹水等。

呢類病人,只能化療同埋做CYTOREDUCTION (或叫DEBULKING)手術,可增力存活時間。

所以,醫生認為佢係卵巢癌,命仔得番半年(聽到呢度,女主人喊左。。。我心中都打定輸數),佢有個四十幾歲年輕的,都係兩年唔夠。

之但係呢。。。末期定義係擴散。

若然腹膜就係PRIMARY呢?

英文GOOGLE 下"primary peritoneal carcinoma"



呢類CASE好少,有META STUDY指出存活年期好短,半年至四年。不過,好多CASE都係198X至200X年間收集。加埋唔夠200個CASE。

我相信,一黎少有,二黎好多人當左係末期咁攪而無真正紀錄在案。

再搵下,有CASE可以生存到八年,GOGOLE一下"腹膜癌"三個中文字,香港只有DISCUSS講擴散左個D,同埋蘋果日報有個阿婆生存左四年再復發要搵人捐錢0既例子。其實個案好少,無得計仲有幾耐命仔。

當時我0既諗法係,如果PRIMARY 就係腹膜,咁跟據定義就唔會係末期!最差都係STAGE3!用番卵巢癌標準,腫瘤仲要少於2CM,係第三期初頭個D。頓時自我想像自HIGH好像有曙光。

點解成日同卵巢癌比?因為係胎兒形成個陣,卵巢同腹膜係同一組織黎,佢地細胞上面0既蛋白質抗原都好似。所以CA125指數都會高左。

家屬期望,當然可能一廂情願啦。而我都只係網上睇,咁少有0既CASE,係咪太過多幻想?

我嘗試用我方法去搵人問。真係好好彩,我有唔少客人親友係醫生。

咁0岩有一個,係瑪麗腫瘤科。我同佢講左報告入面0既野,佢第一個回應已經係同我講primary peritoneal carcinoma!亦提醒我有機會係腸同埋胃0既MUCINOUS CARCINOMA 係PET SCAN 照唔到。

咩黎?就係胃同腸分泌粘液0既細胞。會唔會咁黑仔?原來PET SCAN 唔得,但之前公立醫院0既CT SCAN 係會照得到佢地。(又係我睇番黎)

其他親友醫生,因為唔係腫瘤科專家,結果第一個反應係:"做TEST,搵源頭"

咁唔難理解點解一般醫生都無諗過源頭就係腹膜而並非末期0既癌細胞轉移。

腫瘤科醫生仲同我講,呢個係STAGE3唔係STAGE4!當然我同佢只係WHATSAPP,可能有其他故事我講漏左呢。係咪?

去到呢個位,我都仲未見到瑪嘉烈0既腫瘤科(因外科個邊有明顯甩漏,我地不停迫果位醫生做番D野,如果唔係佢,我媽個問題唔會拖得咁耐!),明天會有一個IN WARD CONSULTATION,又睇下事情發展成點。

預計治療同卵巢癌一樣,三次化療再做手術再三次化療。

不用留言祝咩早日康復了,不如幫我捐下錢。我只係希望同類患者家屬可以GOOGLE到我篇文,免只能睇英文咁無助。

心情好的話,再有續集。

最後,照顧得我媽最好的,就係我老婆。佢一路仆心仆命,真係一個好新抱,在此寫下無言感激。

2017年11月16日 星期四

債價下跌 我可以唔撈嗎 34

講債

近日買左垃圾債券或相關產品0既人,個個話自己中招。

其實小弟都係,債券組合現價沽出,也要蝕2%(未計股息及貸息,計埋就正數有突)。

見有前輩用HYG講短債高息債跌時,大家要睇路,我又拎黎睇下。
(拿,我堅持跟據頭大小而戴帽;同樣借多少承受多少風險又因我個人而定)

六個月圖黎講,真係六個月新低,大插又唔係。

十年圖?2008年果獲勁好多。
舉個例,100跌到60頂得順嗎?值得思考。

同OPTION爆煲一樣,最可怕0既係收緊MARGIN RATIO,而非單一條件下跌。

如果要一次過沽清IB所有非港股,未計派息都係正數黎。(扣除貸款成本,我估都有6至7厘息以上)

講工作

女主人今個月唔知搵唔搵到錢,因為我媽唔舒服,佢多左係屋企少左番工,理論上接單都會少左。同埋,搬屋用左佢唔少腦力同體力。

男主人工作開始期待進入蜜月期,又打算放自己三星期大假,日子未定。當然,手停口停。

我估,我同女主人大家都開始睇開左,搵到就搵吧,盡能力之餘又唔好去到咁盡,無謂太勉強自己。即使資產未完美達標,時間是我們最好的朋友,有人等廿年供完樓嘆世界去,我地只係等多兩年或三年,可必咁辛苦?



講投資

昨日果篇講左,讓我重覆一次:

女主人沽左中海油,剩下一支中石化港股。另持有收息三寶(C PRN,BCS PRD,CTBB),市值97萬4千,男主人擔保佢可以取回99萬。

男主人
WIN CORP DEBT EXCHANGE:TAKE NO ACTION
BKR CASH REDEEM:TAKE NO ACTION
EIT.UN CASH REDEEM:TAKE NO ACTION

預計939張SC@7.75@NOV 會變廢紙
現價建行咁樣,唔打算再SC。

GLD OPTION
重有一日結算
十一月中SC廢紙,權金好少,三百幾美金
開左十二月頭SC同價,兩星期,權金更少,百幾蚊美金
十一月中SP轉倉十二月頭,兩星期,扣番平倉成本收權金,得三百美金

唔想聖誕期間去轉倉,所以唔轉去十二月尾了。

等欠債低過一千萬港元後,剩錢可以買下股票或者待熊。(其實我打算比女主人揀股的,何必太認真?)

講資產

女主人本月427萬(上月414萬),多過標準值(7萬),原因係佢月中先同我報數,起碼減番4萬才準確。
男主人虛數217萬(上月208萬),其實無乜意思,呢個數係咁計:

(所有戶口總值-貸款-建行市值)
即係話,佢係我IB收息組合同手上現金0既淨值

如果用上年十一月至今年十月黎計,每月戶口係多左近20萬0既(工作+收息,增值反而係負數)

講捐款

近日同深水步玩具模型倉老闆傾過,如果寄賣係佢度0既模型賣出,佢唔收我(佣金)。我同時亦打算賣左佢鋪面果兩隻模型。如賣出,扣番模型成本後會全數捐出。

例如鋪面隻DOUBLE X賣1100,我扣番$300,

鋪面隻BB WING GUNDAM 賣到300,我就捐$250。




如有興趣,可主動問下個老闆

2017年11月15日 星期三

債券贖回 搬屋完成

早兩晚老婆問我,好耐無UPDATE呢度,其實一黎佢未CAP SCREEN 比我計佢條數(所以未有十一月份0既我可以唔撈嗎),二黎我阿媽繼續未好番令我擔心,三黎搬屋中。。。

簡單講幾句

而家我外母一星期黎足四五日,真係辛苦佢。我估計我阿媽唔知幾時先好番,或者病情再有新發現,結果小朋友唔可以成日去渡假,而我,就每個星期五都要做湊仔公了。



今日女主人生日,我未諗到送乜,只係昨日去左稻香食788一隻阿拉斯加蟹。四斤重以上,BLOG友話好抵,我又真係唔知。


另,佢帶左個仔去玩。。。

估計下年一月,我每星期再多一日假,都係去做湊仔公而已。

搬屋掉野最開心,新居好新。空氣估唔到咁流通,另外安排兩個小朋友自己訓,大成功!

以上全部都歸功女主人,今次我執野太慢太懶太求其。

佢揀0既新燈同小朋友床,我都好滿意。我張新書台要時間適應,少左幾個櫃桶好難放文件。另外,估唔到新飾櫃放得更多高達!

實木小朋友屋仔床,無味又實淨!

消防車床!呢個好好玩,有埋軚盤。
又大張,叫埋女朋友仔黎訓都得(誤)

舊傢俬?一係掉左,一係二手賣左。(港人買家都幾攪笑,搬運費貴過貨價)

建行又跌番落去,好事係今個月隻CALL可以全袋七千權金,另一方面,就係身價縮水。

女主人高位(10.96?)沽左中海油,仲KEEP住唔生性0既中石化。

另,債WINDSTREAM CORP跌到七個一皮,DEBT EXCHANGE我唔肯,TAKE NO ACTION。

再另,BKR想CASH REDEEM,個價低過PAR,繼續TAKE NO ACTION。

又再另,EIT。UN想BUY BACK BY NAV 95%,計過無SO,唔理佢住啦。

當欠債少過一千萬時,閒錢就可以買下股/待下熊。其實求其一支債券被贖回已達到。

睇人仆街最開心
敗家仔頭三名如下
WIN CORP 7.5
GLD
BKR CORP 8.25

唔計建行,賬面最好睇頭三名(其實係未除淨)
C PRN
HSEB
HTZ CORP 7.375

呀,重有,另一筆捐款都已完成!捐左800比保良局指定買書。收據有就放上黎。

感謝各位支持!

2017年11月3日 星期五

ADSENSE作捐款 遲來的收據!

小弟寫BLOG非為名利,當中有個GOOGLE廣告,若達至若干收入,曾承諾會捐出黎。

老實講,都係無聊試下整。

八月份曾經捐過一次,不過九月尾先有收據。。。


講真,如有心捐,唔駛等夠0既。

其實已經又收左800蚊,仲未得閒拎去捐(一係保良局,一係東華三院,我一向覺得幫年青後生仔才是推動社會0既最好方法)!

2017年10月30日 星期一

股市一個現象,三種演繹。

今日結算日,建行唔上唔落,都係7蚊咁上下。

究竟係結算日回歸月初指數?定大戶死頂一日就鬆手?定係謀定大升?

黎緊個市升定跌?我點知。。。我都只係旦散一名。


就好似上面絛片咁,明明係打劫槍擊案,三把聲音演繹三份稿,感覺可以好唔同。

留意,係感覺,同一件事黎。再加上三位有點點份量0既人講,BUFF效果加成。

女主人港股比例佔佢10%都無,IB收息類優先股BB BOND 反而有25%,佢今日又想賣左兩隻油股,我同佢講,賣左你可以買D乜?反正倉位唔多,等佢放下紙鳶無妨。

呢隻唔係叫紙鳶高達,呢隻係小弟重口味至愛之一
GUNDAM TURN A

可惜佢用CITIBANK買股票,否則可以SHORT CALL一下,等佢扮想沽貨又有權金。

學大前輩MARBO話齋,投資要有攻守備。唔知後市如何,咪又等下LAW。。。

小弟港股倉位總資產過半,而又有借貸,毫無再買貨餘地。只能讓子彈飛。時間越長,收息資產幫助RECOVERY之餘,重剩600天左右0既工作又帶來現金流。

呢D位,只能小量做股票期權濕下腳,聊勝於無,總好過之前股價低迷時。

至少,股票機未見老人團,亦未覺平時高位買貨0既朋友出手。

依稀記得,我自己2006 2007 開始接觸股票期權,貪勝不知輸,無幾耐就大升市來臨,再無幾耐匯控就由14X跌到4X!

今日,買股新手0既未見,但想學SHORT期權0既人增加中。。。今年係2017年。

現在感覺就似認叻收租老人一樣,我低位入,你而家買,有錢齊齊搵,跌左你捱價先。整幾條投資教條,無條件教精你投資,何樂而不為?
Related Posts Plugin for WordPress, Blogger...